 |
|
Aprelin 1-də təhsil müəssisələrində həftənin 5-ci gününə aid dərslər tədris olunacaq.
“Baş nazir Əli Əsədovun Qərarına əsasən, 2025-ci il 27 və 28 mart iş günləri ilə müvafiq olaraq 10 mart və 1 aprel istirahət günlərinin yerləri dəyişdirilib.
Bu səbəbdən aprelin 1-i təhsil müəssisələrində həftənin 5-ci gününə aid dərslər tədris ediləcək.
Ramazan ayının başa çatması ilə əlaqədar məscidlərdə bayram namazı qılınır.
Əjdərbəy məscidində bayram namazı saat 08:00-da qılınıb.
Təzəpir məscidində isə bayram namazı 09:00-da qılınacaq.
Azərbaycanda martın 30 və 31-i Ramazan bayramı qeyd olunur.
Müqəddəs Ramazan bayramı müsəlmanlar tərəfindən hicri təqviminin ikinci (622-ci il) ilindən qeyd olunmağa başlayıb.
Ramazan ayı insanlara Allahı sevməyi öyrədir, onlara öz iradəsini, dözümünü yoxlamaq imkanı verir, insanları gözüaçıq, təmiz vicdanlı olmağa istiqamətləndirir və bunlar orucla ifadə olunur.
Orucluq öz tarixinə Məhəmməd Peyğəmbər (s.ə.s) tərəfindən Mədinədə bu məqsədlə Ramazan ayı keçiriləndən başlayır. Məhz Ramazan ayının sonuncu 10 gecəsinin birində "Qurani Kərim" nazil edilib.
Azərbaycanda Ramazan bayramı 1993-cü ildən dövlət səviyyəsində qeyd olunur.
Xatırladaq ki, bu il Azərbaycanda Ramazan ayı martın 1-də başlayıb. Nazirlər Kabinetinin müvafiq qərarına əsasən, martın 30-u və 31-i Azərbaycanda Ramazan bayramı qeyd edilir.
Daxili İşlər Nazirliyinin Baş Dövlət Yol Polisi İdarəsi (BDYPİ) səfərdən dönən yol hərəkəti iştirakçılarına müraciət edib.
Yol-xeber.az-ın məlumatına görə, müraciətdə qeyd olunub ki, bayram tətilində ayrı-ayrı bölgələrə səfər etmiş əhalinin daimi yaşayış yerlərinə qayıtması ilə əlaqədar magistral yollarda hərəkət intensivliyinin artması müşahidə olunur.
BDYPİ yol hərəkəti iştirakçılarına müraciət edərək bildirir ki, təhlükəsizlik qaydalarına əməl etməli, sürücülər yorğun, yuxusuz halda sükan arxasına əyləşməməli, sərnişinlər isə belə hallara qarşı biganə qalmamalıdır:
"Xüsusilə sürücüləri yola çıxmazdan əvvəl nəqliyyat vasitələrinin texniki sazlığına diqqət yetirməyə, yol və hava şəraitini düzgün qiymətləndirməyə, yolboyu ötmə və manevretmə qaydalarına, sürət rejiminə ciddi əməl etməyə çağırırıq. Uzaq məsafə qət edən sürücü və sərnişinlər qısa müddətli istirahət üçün DYP-nin respublika əhəmiyyətli avtomobil yollarında yerləşən stasionar postlarında yaradılmış şəraitdən istifadə edə bilərlər".
Əvvəllər sosial şəbəkələrdə Çində çəkildiyi bildirilən bir şəkil istifadəçilər tərəfindən tez-tez paylaşılır, xüsusi mükiyyətin toxunulmazlığına dair nümunə kimi təqdim edilirdi.Şəkil beləydi: çoxzolaqlı avtobandır, gediş-gəliş yolları xətlənib, ancaq yolun bir hissəsində gediş xətti 20-30 metr sağa meyllənir, qövs cızır, eyni yerdə gəliş yolu da o cür sağa meyllənir, ortada isə bir ev və həyətyanı sahə var.
Belə izah verilirdi ki, bu avtoban çəkiləndə ev-həyət sahibini razı salmaq, köçürmək mümkün olmayıb, ona görə də magistralı layihələndirən yerli hökumət çıxış yolunu yolu hər iki tərəfdən sağa meylləndirməkdə görüblər.
Başqa ölkə olsaydı, hekayətin həqiqiliyinə şübhə etməmək olardı. Ancaq Çində repressiv kommunist rejimi hökm sürdüyündən və bu ölkədə dövlət layihələrinə qarşı çıxmaq sabotaj, dövlət cinayəti sayıldığından böyük ehtimalla bu gerçək görüntü deyil, təbliğat üçün nəzərdə tutulub. Yoxsa Çin kommunistlərinin əlində həmin evi yerlə-yeksan etmək, sahibini də divara söykəyib güllələmək elə də çətin iş deyil.
Hər halda bu şəkil mülkiyyət toxunulmazlığının simvolu kimi illərdir internet resurslarını dolaşır.
Əlbəttə, belə görüntülərə qanunun aliliyi gözlənilən ölkələrdə rast gəlmək olar, amma vəhşi kapitalizmin dişlərinin köpək balığının mişar dişləri kimi şaqqıldadığı ölkələrdə xüsusi mülkiyyət-filan hərləyən yoxdur.
İndiyədək o qədər kimsəsiz, əli heç yerə çatmayan sadə adamların evini başına uçurublar, toz-torpaq içində boğaraq, evini dəyər-dəyməzinə satmağa məcbur ediblər ki...
Çox höcətlik edən, evini deyilən qiymətə satmaq istəməyənlərin mülkünün gecəylə yanması halları da olub.
“Tikinti mafiyası” deyilən ifadə ortalığa durduq yerə çıxmayıb. Əlində yüz milyonlarla pul olan, arxalı, dayaqlı, əlaqəli, yüksək vəzifəli qohumları tərəfindən himayə olunan şirkət rəhbərləri ilə döşə-döşə gəlmək hər adamın, hətta heç kəsin dişinin batacağı xörək deyil.
Bəhsə durmuş kimi, bir hektar ərazidə iç-içə, eyvan-eyvana durmuş 7 çoxmərtəbəli bina ucaldan və kvadratmetrini ən baha qiymətlə satan adamlar nə şəhərsalma qaydalarına, nə xüsusi müıkiyyətin toxunulmazlığına riayət edən deyillər. Onların məqsədi var: bu bina burada tikilməlidir – nəyin bahasına olursa, olsun.
Alatavada, içində sakinlər yaşayan, xüsusi mülkiyyət sənədi də olan evin günün günorta çağı uçurulması hadisəsinə bu kontekstdən yanaşmaq lazımdır. Bina tikənlər üçün fərqi yoxdur, o ev xüsusi mülkiyyətdir, ya yox, heç evin real dəyərinin onların təklif etdiyindən qat-qat baha olması da veclərinə deyil. Plan budur ki, adamlar evi boşaltmalı, verilən pulu götürüb getməlidirlər.
Həmin pula onlar başqa yerdə ehtiyacları olan böyükdə mənzil tapacaqlar, tapmayacaqlar, bu da inşaat aparan şirkəti maraqlandırmır. “Onların canı cəhənnəmə, əsas bizim biznesimizdir” – düşüncə budur.
İndi xəbər var ki, evin zədələnməsinə dair göstəriş verən iş icraçısını və maskalı ekskavatorçunu saxlayıblar. Şirkət rəhbərliyi deyir, evdağıtma hadisəsi səhvən olub. Sanasan, masa üstündə bir stəkan su varmış, adamın əli dəyib, aşıb.
Əlbəttə, şirkət sahibləri tutulanları içəridə qoymayacaqlar. Heç özləri də bu əmələ görə o qədər də ciddi cəza almayacaqlar. Hamı işin içindən sıyrılacaq. Yəqin ki, bu qalmaqaldan sonra zərərçəkmiş ailə də yetərli qədər təzminat alacaq.
Ancaq sosial şəbəkədə hadisəyə dair şərh yazanların içində iş icraçısına və ekskavatorçuya ürəyi yananlar da var. Guya ki, onlar əmr quludurlar, deyiləni ediblər. Elə deyil. Onlar “killer”dirlər, sifariş əsasında adam öldürməklə sifariş alaraq ev uçurmağın arasında elə bir fərq yoxdur. İkisi də cinayətdir. Ekskavatorun çalovuşu, kəpçəsi evin qapı-pəncərəsini, divarını zədələdiyi vaxt yaxınlıqda adam olsaydı, aldığı zərbədən iki saniyənin içində öləcəkdi.
Məhz belə adamlar qanunsuz, cinayət xarakterli əmrləri icra edərək insanlara zülm edirlər.
Paytaxtı dəmir-beton cəngəlliyə çevirənlərin, şəhərin evini yıxanların gözü doyan deyil. Bu gedişlə onlar bir uşaq meydançası, yaşıllıq zolağı, məhəllə arası qoymayacaqlar, hamısını düzləyib, bina qaldıracaq, onsuz da yaşamağın, hərəkətin gündən-günə çətinləşdiyi Bakını Kəlküttəyə, Mumbaya, Şanxaya döndərəcəklər.
Bu özbaşınalığın və vəhşiliyin qarşısını almaq üçün tədbirlər görülməlidir. Nümunə götürülməli presedent var. Bir çox şəhərlərdə yeni yaşayış massivlərini yalnız şəhərkənarı ərazilərdə salmağa izn verirlər və şəhərin mərkəzi toxunulmaz saxlanılır.
P.S. Qoogledə axtarış apararkən Çində xüsusi mülkiyyətinin toxunulmazlığının simvolu olan daha bir neçə şəkil çıxdı.
Azərbaycanın bütün məscidlərində martın 30-da Ramazan bayramı münasibətilə bayram namazları qılınacaq.
Bununla bağlı Qafqaz Müsəlmanları İdarəsi (QMİ) məlumat yayıb.
Qeyd edilib ki, Bakıda Əjdərbəy məscidində bayram namazının vaxtı saat 08.00, Təzəpir məscidində 09.00-a təyin edilib.
“13 yaşlı qız ana qayğısına, nəvazişinə, sığalına möhtackən özü ana olursa, deməli biz hələ də Mirzə Ələkbər Sabirin, Cəlil Məmmədquluzadənin, Axundzadənin olduğu dövrdə yaşayırıq. Dünya neçə əsr adlasa da, biz yerimizdə sayırıq”.
Bu sözləri təhsil eksperti Elçin Əfəndiyev deyib.
O bildirib ki, son 10 ildə 18 yaşadək analar dünyaya 19854 uşaq gətirib:
“Onlardan 13513 nəfəri kənd, 6341 nəfəri isə şəhər qeydiyyatıdır. Bu, hələ rəsmi statistikadır. Hələ bunun qeyri-rəsmi olanı və abortu da nəzərə alsaq, görün vəziyyət nə qədər acınacaqlıdır.
Respublikamızın bəzi bölgələrində cahillik hökmranlıq edir. Yaşı 15 olub nişanlanmayan qıza evdə qalmış gözü ilə baxılır. Ətrafdakılar dedi-qodulara başlayır. Görəsən, nə problemi var, nəcəb qapısını döyən yoxdur və s. axmaq düşüncələr. Bu dəhşətdir”.
Ekspert hər kəsi belə hallara qarşı mübarizəyə səsləyib:
“Erkən nikahlara qarşı olmalıyıq. Dəfələrlə səsləndirdiyim bir fikrimi yenə də qeyd edirəm: qızı olan valideynlər övladlarının nikah haqqında şəhadətnamə almalarına deyil, təhsil haqqında sənəd almalarına çalışmalı, qızlarının 11 illik attestatı, ali və ya orta ixtisas təhsili haqqında diplomu ilə qürurlanmalı, fəxr etməlidirlər. Yalnız bu halda biz inkişaf edəcək, düşdüyümüz cahillik bataqlığından çıxacağıq”.
Azərbaycanda tanınmış iş adamı, “Melissa Group” tikinti şirkətinin sahibi Qalib Məmmədov saxlanıldı. Qalib Məmmədov dünən axşam saatlarında Yasamal rayonunda baş verən qanunsuz və qəddar ev söküntüsü faktı ilə bağlı hüquq-mühafizə orqanları tərəfindən saxlanılıb.
Martın 27-də baş verən “vandal söküntü” işlərindən sonra Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi tərəfindən əraziyə baxış keçiriblər. Məlum olub ki, “Meliss Park” rəsmiləri vətəndaşın mülkiyyətini heç bir məhkəmə qərarı olmadan, söküntü işləri üçün müvafiq icazə olmadan aparıblar. Görülən işlər vətəndaşlarla tam razılıq əldə edilmədən və mövcud qanunvericiliyin tələblərinə zidd aparıldığı üçün Baş İdarə tərəfindən aidiyyəti qurumlarla birlikdə dayandırılıb və aktlaşdırılıb. Qanunsuz işlər zamanı vətəndaşların mülklərinə dəymiş ziyanla bağlı müvafiq araşdırma aparılması üçün materiallar Baş İdarə tərəfindən hüquq-mühafizə orqanlarına təqdim edilib. Bundan sonra, “Melissa Group”un sahibi Qalib Məmmədovun saxlanılması qərarı verilib.
Onun rəhbərlik etdiyi şirkətin Yasamalda kompensasiya ödənilmədən və hüquqi razılaşma olmadan, içərisində hələ də sakinlər yaşayan yaşayış binasını sökməsi faktı ictimaiyyətdə dərin narazılıq doğurub. Vətəndaşların mülkiyyət hüququ açıq-aşkar, ciddi şəkildə pozulduğu göz önündədir. Hadisə “vandal söküntü” kimi qiymətləndirilir və ictimai rezonans doğurub. Qalib Məmmədovun əməllərinə hüquqi qiymət verilməsi üçün artıq cinayət işi açıldığı ehtimal olunur. Məsələ ictimaiyyətin və medianın diqqət mərkəzindədir. Hüquq-mühafizə orqanları bildiriblər ki, araşdırmalar davam edir və hadisənin bütün iştirakçıları məsuliyyətə cəlb olunacaq.
“Bakı” Hüquq Şirkətinin rəhbəri Natiq Ələsgərov Musavat.com-a deyib ki, “Melissa Group” rəsmilərinin törətdiyi əməl birmənalı cinayətdir və hüquq mühafizə orqanlarının reaksiyası da adekvatdır: “Son zamanlar tikinti şirkətlərinin özbaşınalığı halları artıb. Halbuki onlara görəcəkləri işlər üçün icazə veriləndə, vətəndaşların köçürülməsi, onlara ədalətli kompensasiyanın verilməsi xüsusi olaraq tapşırılır. Buna baxmayaraq, tikinti şirkətləri rəsmiləri bütün əndazələri aşan qanunsuzluğa getməkdən çəkinmirlər. “Pulumu vermişəm, ərazini almışam” düşüncəsi bu adamların gözlərini tutur. Ərazidəki vətəndaşların mülkiyyət hüquqlarına açıq-aşkar qəsd halları var. Azərbaycan məhkəmələrində, xüsusilə Bakı şəhərində tikinti şirkətlərinin qanunsuzluqlarını əhatə edən minlərlə məhkəmə çəkişmələri var. Azərbaycan Respublikasının Konstitusiyasının 29-cu maddəsi və Mülki Məcəllə vətəndaşlarının hüquqlarının qarantıdır. Hətta ev qeyri-qanuni tikili olsa belə orada yaşayan şəxslər çıxarılmadan, təxliyə prosesi araşdırılmadan, vətəndaşlara məlumat verilmədən heç bir söküntü aparıla bilməz”.
Natiq Ələsgərov deyib ki, Yasamalda “at oynadan” təkcə “Melissa Group” rəsmiləri deyil: “Hazırda Bakının köhnə məhəllələrinin yenilənməsi prosesi gedir. Lakin çox təəssüf ki, bu işləri icra edən tikinti şirkətləri vətəndaşların mülkiyyət hüquqlarına qarşı cinayətlər törətməkdən çəkinmirlər. Məsələn, “Vialon” MMC tikinti şirkətinin rəsmiləri də Yasamalda, Ağadadaş Qurbanov küçəsi ev 23-də “Melissa Group” rəsmilərindən geri qalmayan hərəkətlərə yol veriblər. Təsəvvür edin ki, vətəndaş Ramin Ağayevin mülkiyyəti yaşayış olduğu bir vaxtda ekskavatorla sökülüb.
Halbuki Fövqəladə Hallar Nazirliyinin müvafiq qurumu “Vialon” MMC-yə həmin ünvanda söküntü işlərinin dayandırılması göstərişi verib. MMC rəsmiləri isə bu xəbərdarlığa məhəl qoymurlar. Məhkəmələr də belə halların qarşısını almaq üçün kəsərli qərarlar vermir. Belə qərarlar iş işdən keçəndən sonra verilir. Tikinti şirkəti vətəndaşın mülkiyyətini qazsız, elektriksiz, yolsuz, kanalizasiyasız və digər zəruri kommunal xidmətlərdən məhrum edir. Bu yolla vətəndaşı mülkiyyətini dəyər-dəyməzə tikinti şirkətinə satmağa məcbur edirlər. Bunan sonra məhkəmə söküntü işlərinin dayandırılması qərarı verir. O qərar da heç kimə lazım olmur. Və ya məhkəmə qərarına tikinti şirkətləri məhəl qoymurlar. Bu kimi hallar məbuatda kifayət qədər işıqlandırılır. Çox təəssüf ki, tikinti şirkətlərinin qanunsuzluqlarını durdurmaq mümkün olmur. “Vialon” MMC-nin “Kubinka”da törətdiyi qanunsuzluqlar “Melissa Group”un törətdiklərindən geri qalmır. Vətənaşların mülkiyyətləri ilə yanaşı ekoloji cinayətlər də törədirlər. Ərazidəki yaşıllıqları da məhv edirlər”.
Natiq Ələsgərov deyib ki, İnzibati Xətalar Məcəlləsinə görə, Yasamalda “Melissa Group” rəsmilərinin törətdiyi qanunsuzluqlar cinayət məsuliyyəti yaradır: “Ortada hər hansı bir hüquqi əsas olmadan mülkiyyətə müdaxilə göz önündədir. Ekskavatorun sürücüsü heç bir zaman özbaşına kiminsə mülkünü dağıtmaz. Ona göstəriş verən iş icraçısıdır. Bəs iş icraçısına belə bir qanunsuzluğa getməsi üçün göstərişi kim verib? Bu göstərişi Qalib Məmmədov verib-verməyib, bunun əhəmiyyəti yoxdur. Qalib Məmmədov şirkətin 1 nömrəli cavabdeh şəxsidir və işlərin qanunlar çərçivəsində görülməsinə də cavabdeh birbaşa odur. Mülkiyyətə qəsd böyük bir cinayətdir və 1 ekskavatorçu, iş icraçısı belə asanlıqla vətəndaşın evini başına uçura bilməz. Qalib Məmmədov da gedib onların yanında oturdulmalı, ona yeri göstərilməlidir ki, digər tikinti şirkətlərinin sahibləri özbaşınalıqlara son qoysunlar!”
Natiq Ələsgərov deyib ki, törədilən hərəkətlər Azərbaycan Respublikasının Cinayət Məcəlləsinin Əmlakı qəsdən məhv etmə və ya zədələmə (186) maddəsinə tövsif olunan əməllərdir: “Ortada qəsdən, mülkdə yaşayış ola-ola və bunu bilə-bilə ekskovatorla dağıtma əməli var. Bu, ümumi təhlükəli üsuldur. Əgər insan həyatına təhlükə yaranırsa, şəxsiyyət əleyhinə cinayət də sayılır. Yaşayış binasının içərisində insan olduğu üçün bu, həm də xüsusi təhlükəli əməl sayılır. Bu isə 186-cı maddənin 2.2-ci bəndi ilə - yandırmaqla, partlatmaqla və ya başqa ümumi təhlükəli üsulla törədilmiş əməl kimi tövsif oluna bilər. Belə əməllər 3 ildən 7 ilədək müddətə azadlıqdan məhrum etmə ilə cəzalandırılır”.
Natiq Ələsgərov deyib ki, qanunla heç bir vətəndaş, ailə evindən çıxmırsa, onu zorla çıxara bilməzlər. Söküntü işləri məhkəmə qərarı ilə başlaya bilər. Lakin yenə də təxliyə işləri aparılmadan heç bir söküntü aparmaq olmaz. Vətəndaşlar Baş Prokurorluğa, Ombudsman Aparatına, Dövlət Şəhərsalma və Arxitektura Komitəsinə, FHN-ə və polisə şikayət edə bilərlər. Bu hadisə bir daha göstərdi ki, vətəndaş hüquqlarını pozan və özbaşına addımlar atan heç bir sahibkara güzəşt olunmayacaq. Qanun hamı üçün eynidir.
Ağdamın Sarıcalı kəndində sakinlərə verilən evlərin həyətyanı sahəsinin həcmi bəlli olub.
Bu barədə Prezident İlham Əliyev ötən gün Ağdamda buraya köçən sakinlərlə görüşündə bildirib.
Dövlət başçısı bildirib ki, Sarıcalı kəndinin, sadəcə olaraq, birinci mərhələsinin inşası başa çatıb:
“Burada hazırda 200-dən çox ev var. Amma ikinci mərhələ başa çatandan sonra təqribən evlərin sayı 400-ə çatacaq. Yaşamaq üçün bütün şərait var. Gözəl, yaraşıqlı evlər, elektrik, su, qaz, istilik, gözəl məktəb, uşaq bağçası, tibb məntəqəsi, idman meydançası, ictimai xidmət yerləri, hətta bazar kompleksi də var. Evlərin həyətyanı sahəsi də kifayət qədər böyükdür - 12 sot. Eyni zamanda, ətraf ərazilərə su veriləndən sonra o torpaqlarda da əkin-biçin işləri aparmaq mümkün olacaq. Sərsəng su anbarı və Suqovuşan su anbarı bu imkanı bizə yaradacaq. Sadəcə olaraq, vaxtilə inşa edilmiş kanallar bərpa edilməlidir. Bu istiqamətdə də iş gedir”.
Xəbər verdiyimiz kimi, ötən gün Prezident İlham Əliyev və birinci xanım Mehriban Əliyeva Ağdam rayonunun Sarıcalı kəndinin birinci mərhələsinin açılışında iştirak ediblər.
“Ölkə rəhbərliyinin Ağdamın ilk sakinləri ilə görüşündən fotoları təqdim edirik:
