 |
|
Bu gün Azərbaycan Prezidenti İlham Əliyevlə ölkəmizdə rəsmi səfərdə olan Gürcüstan Prezidenti Mixeil Kavelaşvilinin təkbətək görüşü keçirilib.
“Bu barədə Prezidentin Mətbuat Xidməti məlumat yayıb.
Bu dəqiqələrdə Azərbaycan Prezidenti İlham Əliyevlə ölkəmizdə rəsmi səfərdə olan Gürcüstanın Prezidenti Mixeil Kavelaşvilinin təkbətək görüşü keçirilir.
Bununla bağlı Prezidentin Mətbuat Xidməti məlumat yayıb.
Gürcüstan Prezidenti Mixeil Kavelaşvili bu gün Fəxri xiyabana gələrək xalqımızın Ümummilli Lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə əklil qoyub.
“Qafqazinfo” xəbər verir ki, görkəmli oftalmoloq-alim, akademik Zərifə xanım Əliyevanın da xatirəsi yad olunub, məzarı üzərinə tər güllər düzülüb.
***
Azərbaycanda rəsmi səfərdə olan Gürcüstan Prezidenti Mixeil Kavelaşvili Şəhidlər xiyabanını da ziyarət edib.
Mixeil Kavelaşvili Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsini ehtiramla yad edib, “Əbədi məşəl” abidəsinin önünə əklil qoyub.
Sonra Bakının ən hündür nöqtəsindən paytaxtın mənzərəsini seyr edən ali qonağa Şəhidlər xiyabanının tarixi və şəhərdə görülən abadlıq-quruculuq işləri barədə məlumat verilib.
Gürcüstan Prezidenti Mixeil Kavelaşvili aprelin 16-da Fəxri xiyabana gələrək xalqın Ümummilli Lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə əklil qoyub.
Görkəmli oftalmoloq-alim, akademik Zərifə xanım Əliyevanın da xatirəsi yad olunub, məzarı üzərinə tər güllər düzülüb.
Eyni zamanda Azərbaycanda rəsmi səfərdə olan Gürcüstan Prezidenti aprelin 16-da Şəhidlər xiyabanını da ziyarət edib.
Mixeil Kavelaşvili Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsini ehtiramla yad edib, “Əbədi məşəl” abidəsinin önünə əklil qoyub.
Sonra Bakının ən hündür nöqtəsindən paytaxtın mənzərəsini seyr edən ali qonağa Şəhidlər xiyabanının tarixi və şəhərdə görülən abadlıq-quruculuq işləri barədə məlumat verilib.
Erməni cəmiyyəti stabil fikrə malik deyil, bu gün iqtidarı dəstəkləyirsə, sabah belə olmaya bilər; odur ki... - iki rəy
“Əgər Nikol Paşinyan payıza qədər hakimiyyətdən uzaqlaşdırıla bilməsə, hakimiyyət seçkilərə gedəcək”. “Yeni Müsavat” xəbər verir ki, bunu “Ermənistan” blokundan olan revanşist deputat Qarnik Danielyan “Ermənistan xəbərləri” - NEWS.am-ın müxbirinə müsahibəsində deyib. Onun proqnozlarına görə, belə olan halda bütün siyasi qüvvələr istər-istəməz seçkilərə qatılmalı olacaq.
Danielyan həmçinin “daxilində hər şeyin rəvan getmədiyi” müxalifətin konsolidasiyasının vacibliyinə diqqət çəkib. “Bütün müxalifət qüvvələrin eyni ideyaya və yanaşmaya sahib olduğunu söyləmək yanlış olar. Belə olsaydı, Paşinyan indi hakimiyyətdə olmazdı. Fikir ayrılıqları olsa da, hər halda, "qırmızı xətləri" keçməmək lazımdır. Əgər problemlər varsa, onları aydınlaşdırmaq və həll etmək gərəkdir", - radikal müxalifətçi deputat qeyd edib və Gümrüdəki mer seçkilərindən sonra bütövlükdə ölkədə hakimiyyət dəyişikliyinə nail olmağa çalışmağın mümkünlüyü fikri ilə razılaşıb.
Paşinyan payızda erkən seçkilərə, onun ardınca konstitusiya referendumuna gedə bilərmi? O halda radikal-revanşist müxalifətin iqtidara qarşı vahid cəbhədə birləşməsi və qalib gəlməsi mümkündürmü? Azərbaycanın erkən seçkilərdən gözləntisi nədir?
Fikrət Yusifov
Siyasi və iqtisadi məsələlər üzrə şərhçi Fikrət Yusifovun “Yeni Müsavat”a dediyinə görə, Paşinyan çirkli siyasi gedişlərə yol versə də, bütövlükdə Ermənistanı gerçək bir dövlətə çevirməyə çalışır: “Paşinyan hakimiyyətinin istəmədiyi hər hansı seçkinin baş tutması mümkün deyil. Paşinyanın tərəfdaşlarına 70, müxalif qüvvələrə dəstək 30 faizdir. Bu barədə dəfələrlə bildirmişəm. Belə olmasaydı, 44 günlük müharibədəki biabırçı məğlubiyyətdən dərhal sonra keçirilən seçkilərdə Paşinyan qalib gələ bilməzdi. Paşinyan həm daxildəki siyasi rəqiblərinə yerini göstərdi, həm də xalqın böyük əksəriyyətinin onun tutduğu yolu dəstəklədiyini dünyaya nümayiş etdirdi”.
Ekspertin fikrincə, Paşinyan hakimiyyətinə qədər Ermənistan Rusiyanın açıq-aşkar forpostu rolunu oynayan, dırnaq arasında olsa da bir dövlət kimi qələmə verilən subyekt idi: “Paşinyan bu forpostdan dövlət düzəltməyə qalxdı. Ermənistan əhalisinin 2/3-dən çoxu da Paşinyanla birlikdə yaşadıqları ölkənin oyuncaq statusunun dəyişdirilməsi uğrunda mübarizəyə qoşuldu. Paşinyan çalışır ki, Rusiya və onun "5-ci kolon"u hakimiyyətə qarşı nə isə edə bilməsin. Heç şübhə etmirəm ki, o, 2019-cu ildə Şuşada yallı gedərkən də Qarabağın Azərbaycana qaytarılacağından əmin idi. Sadəcə, həmin dönəmlərdə o, bu məsələni dilinə belə gətirə bilməzdi, əksinə, ermənilərin başlarını Qarabağ eyforiyası dumanlandırdığı dövrd “Qarabağ Ermənistandır” deməliydi. Lakin zamanı yetişəndə Qarabağın Azərbaycana aid olduğunu dedi. Ermənistan Konstitusiyasında ərazi iddialarını aradan qaldırmaq istəsə də, edə bilmədi, çünki əks qüvvələr bundan hakimiyyəti devirmək üçün istifadə edə bilərdilər".
F.Yusifov hesab edir ki, Paşinyana erməni xalqını bu dəyişikliyin zəruri olduğuna inandırmaq üçün zaman lazım idi: “Bu gün həmin dəyişikliyi etməyə üz tutub. Bir sözlə, indi hansı müxalif deputatın necə boşboğazlıq etməsindən asılı olmayaraq, Ermənistanda seçkilərin nə vaxt keçirilməsi kimi məsələlər Paşinyan hakimiyyətinin istəyinə uyğun bir şəkildə həll olunacaq.
Sona Əliyeva
Siyasi təhlilçi Sona Əliyeva isə belə hesab edir ki, Paşinyan referendum məsələsini çox yubatmamalıdır: “Qarnik Danielyan Kremlə yaxınlığı ilə seçilən, hətta müharibədən sonra Rusiyaya qarşı İrəvandakı kütləvi mitinqlərin keçirilməsinə etiraz edən rusiyameyilli siyasətçidir. Daha əvvəl radikal-milliyətçi "Voskanapart" könüllülərinin tərkibində olub və siyasi karyerası da məhz oradan başlayıb. Bir sözlə, Danielyanın fikirlərini Kremlin proseslərin axarına münasibəti kimi də dəyərləndirmək olar. Hazırda Ermənistan müxalifəti parçalanıb və Paşinyan əlindəki bütün rıçaqlardan, o cümlədən “həbs maşını”ndan istifadə edərək öz rəqiblərinin əl-qolunu bağlaya bilib. Əgər kənar müdaxilə olmazsa, Nikolu devirmək çətin görünür".
Onun qənaətinə görə, ıənar müdaxilə isə birbaşa Moskvadır: “Görünən odur ki, əgər Ukraynadakı savaş bu yay ərzində bitərsə, o zaman Rusiya Ermənistanda "qırmızı inqilab" həyata keçirəcək. Buna qədər Rusiyadakı erməni milyarderlərdən yeni siyasi fiqur hazırlayıb İrəvana göndərəcəklər. Rusiya Azərbaycanla sülh sazişinin imzalanmasını istəmir. Hətta yeni konflikt ssenarisini işə keçirmək üçün Azərbaycanla Ermənistan arasında boşluqlar axtarır. Son günlər atəşkəsin pozulmasının əsas sifarişçisi də Kremldir. Şimal qonşumuz əlində maşa kimi oynatdığı erməni zabitlərə birbaşa Moskvadan təlimatlar verir. Hadisələrin çıxış yolu isə Paşinyanın ən qısa zamanda seçkilərə, yəni referenduma getməsidir. Azərbaycan və Türkiyəyə qarşı ərazi iddialarından İrəvan rəsmi qaydada əl çəkməlidir. Bu, Paşinyanın hakimiyyətdə qalmaq şanslarını da artıracaq. Hətta sülh sazişinə imza atmaqla kapitulyantdan qəhrəmana çevrilə bilər. Təbii ki, bu, gələcək tarix üçün atılacaq addımdır. Üstəlik, erməni cəmiyyəti stabil fikrə malik deyil. Natamam təfəkkürü olan cəmiyyətdir. Bu gün erməni cəmiyyəti Paşinyanı dəstəkləyirsə, sabah belə olmaya bilər. Ona görə də referendum məsələsini çox yubatmamalı və növbəti ilə saxlamamalıdır".
Çinin Azərbaycana yeni təyin olunmuş səfiri Lu Mey aprelin 14-də diplomatik vəzifəsinin icrasına başlamaq üçün Bakıya gəlib.
Çin Xalq Respublikasının Azərbaycandakı səfirliyindən “Report”a bildirilib ki, Lu Meyi hava limanında Azərbaycan Xarici İşlər Nazirliyinin nümayəndələri, həmçinin Çin səfirliyinin əməkdaşları və yüksək vəzifəli diplomatları qarşılayıblar.
Qarşılanma mərasimində səfir qeyd edib ki, Çin və Azərbaycan təkcə səmimi və etibarlı dostlar deyil, həm də bərabərhüquqlu və qarşılıqlı faydalı tərəfdaşlardır.
L.Mey vurğulayıb ki, iki ölkə liderinin strateji rəhbərliyi altında ikitərəfli əməkdaşlığın bütün istiqamətlərdə inkişaf etdiyi dövrdə Çini Azərbaycanda təmsil etmək onun üçün böyük şərəfdir.
14 aprel 2025-ci il tarixində Fransanın Avropa və xarici işlər naziri Jan-Noel Baro Avropa İttifaqı ölkələrinin xarici işlər nazirlərinin Lüksemburqda keçirilən iclası çərçivəsində çıxış edərkən regional gərginlik, sülh prosesi və hazırda Azərbaycanda mühakimə olunan ermənilərlə bağlı bəzi anti-Azərbaycan iddiaları səsləndirib.
Xarici İşlər Nazirliyi fransalı nazirin bəyanatını tənqid etdiyi halda, Fransanın Azərbaycandakı səfiri öz "X" hesabında bu iddiaları yenidən paylaşıb.
Xarici İşlər Nazirliyinin mətbuat katibi Ayxan Hacızadə məsələyə münasibət bildirərkən Fransanın Avropa və xarici işlər naziri Jan-Noel Baronun Fransanın Azərbaycandakı səfirinin də istinad etdiyi iddialarını qətiyyətlə rədd etdiklərini və pislədiklərini bildirib.
O bildirib ki, Fransanın siyasətindəki ikili yanaşma - sülh niyyətini bəyan edərkən münaqişəyə sürükləyən davranışlar - narahatlıq doğuran uyğunsuzluğu nümayiş etdirir. Belə ikiüzlü siyasət regionda davamlı sülh perspektivlərinə mane olur.
"Fransanın Ermənistanı öldürücü silahlarla təmin etməsi, onun davamlı anti-Azərbaycan mövqeyi ilə yanaşı, sülh prosesinə xələl gətirir və bu xarici işlər naziri Jan-Noel Baronun regional gərginliklə bağlı açıq şəkildə narahatlığını ifadə etməsi ilə tamamilə ziddiyyət təşkil edir.
Bundan əlavə, sülh müqaviləsi layihəsi üzərində işin yekunlaşdırılması mühüm hadisə olsa da, Fransa tərəfi yaxşı başa düşür ki, sülh sazişinin imzalanması və davamlı sabitlik digər məsələlərlə yanaşı, əsas problemlərin, xüsusilə də Ermənistanın Konstitusiyasındakı ərazi iddialarının aradan qaldırılmasını, habelə Minsk Qrupunun və ATƏT-in digər əlaqəli strukturlarının rəsmi şəkildə ləğvini tələb edir.
Bəşəriyyətə qarşı cinayətlərdə təqsirləndirilən şəxslərin məhkəmə proseslərinə maneçilik törədilməsi ölkənin suverenliyinə müdaxilə olmaqla yanaşı, dəhşətli qəddarlıqlara görə məsuliyyətin müəyyən edilməsi prosesini sarsıdır. Fransanın bu cür müdaxiləsi cinayətkarları qorumaqla, cəzasızlığın davamıma xidmət edir.
Fransa regional işlərimizə qarışmaq əvəzinə, təkcə Azərbaycan deyil, müxtəlif dövlətlər tərəfindən böyük tənqidlərə məruz qalan, xüsusən də dənizaşırı ərazilərində və Afrikada həyata keçirdiyi neokolonial siyasətindən əl çəkməlidir.
Fransız neokolonializmi yerli əhalini və resurslarını istismar etməklə bərabər, həmişə fransız maraqlarını həmin dövlətlərin rifahından üstün tutub, habelə uzunmüddətli qeyri-sabitlik və etnik gərginlik yaradıb
Heç kimə sirr deyil ki, Fransanın xarici siyasəti onun qondarma “sivilizasiya missiyası”nın mənəvi cəhətdən iflasa uğradığını nümayiş etdirir.
Sülhə xidmət etməyən və regionda sabitliyə xələl gətirən addımlara son qoymağı Fransadan tələb edirik.", - diplomat bildirib.
Aprelin 15-də görkəmli oftalmoloq-alim, akademik Zərifə Əliyevanın vəfatından 40 il ötür. Onun nurlu xatirəsi xalqımız tərəfindən hörmətlə anılır.
Akademik Zərifə Əliyevanın anım günündə onun həyat və fəaliyyətinin bəzi məqamlarına nəzər salırıq:
Naxçıvanın Şahtaxtı kəndində dünyaya göz açmış Zərifə Əliyeva zəngin və mənalı ömür yaşayıb. Atası - görkəmli ictimai və dövlət xadimi Əziz Əliyevin ömür yolu onun üçün əsl həyat məktəbi olub. Zərifə xanım müasir müstəqil Azərbaycan dövlətinin memarı və qurucusu Ümummilli Lider Heydər Əliyevin ömür-gün yoldaşı, dostu və silahdaşı idi. Vaxtilə ata evində görüb-götürdükləri respublikanın birinci şəxsinin xanımı olduğu zamanlarda köməyinə çatıb. O, Ulu Öndərə mənəvi dayaq, arxa olub.
Akademik Zərifə Əliyevanın tədqiqatları, alim kimi qazandığı böyük uğurlar Azərbaycan tibb elminin tarixində xüsusi mərhələ təşkil edir. O, Azərbaycan Tibb İnstitutunu bitirəndən sonra təhsilini Moskvada, Həkimləri Təkmilləşdirmə İnstitutunda davam etdirib. Əmək fəaliyyətinə 1949-cu ildə Azərbaycan Elmi-Tədqiqat Həkimləri Təkmilləşdirmə İnstitutunda elmi işçi kimi başlayıb və bütün ömrünü tibbin oftalmologiya sahəsinə həsr edib.
1940-1950-ci illərdə Azərbaycanda göz xəstəlikləri, xüsusən traxoma geniş yayılmışdı. İnsanları bu bəladan xilas etmək, eləcə də digər aktual problemə - gözün peşə xəstəliklərinə dair fundamental tədqiqatlar aparmaq, onların effektli müalicə metodlarını və profilaktik tədbirləri işləyib-hazırlamaq lazım idi. Beləliklə, gənc tədqiqatçının elmi araşdırmalarının mövzusunu həyat özü müəyyənləşdirir və o, elmi istiqamətlərinin ilkin mərhələsini traxomanın müalicəsinə həsr edir. Bu xəstəliyin daha geniş yayıldığı rayonlara gedir, xəstəlik ocaqlarını aşkarlayır, göz həkimlərinə mühazirələr oxuyur, əhali arasında söhbətlər aparırdı.
Çox keçmədən Zərifə xanım traxoma xəstəliyinin başlanğıc dövründə sintomisinin tətbiqində uğurlu nəticələrə nail oldu. Tədqiqatlarının yekunu olaraq 1959-cu ildə “Traxomanın digər terapiya üsulları ilə birlikdə sintomisinlə müalicəsi” mövzusunda namizədlik dissertasiyasını uğurla müdafiə etdi. Onun təklif etdiyi müalicə metodu respublikamızda geniş tətbiq olundu və traxomanın bir xəstəlik kimi aradan qalxmasında mühüm rol oynadı.
Zərifə xanımın oftalmoloq-alim kimi diqqət yetirdiyi aktual problemlər sırasında diaqnostika, qlaukomanın və görmə orqanının iltihabının müalicəsi xüsusi yer tuturdu. O, oftalmologiyanın elmi cəhətdən az araşdırılmış sahəsi - görmə orqanının peşə patologiyasını dərindən tədqiq edib. Bu problemin aktuallığı yalnız kimya və elektronika sənayesinin geniş inkişafı ilə deyil, həm də bir çox yeni kimyəvi birləşmələrin görmə orqanına təsirinin tədqiqi ilə əlaqədar idi. Zərifə xanım bu sahənin ilk tədqiqatçısı olub. O, dünyada ilk dəfə olaraq görmə orqanının peşə patologiyasını araşdıran elmi-tədqiqat laboratoriyası yaradıb və elm aləmində yeni bir istiqamətin - peşə oftalmologiyasının əsasını qoyub. Bu sahəyə dair araşdırmalarının ilkin nəticələrini ümumiləşdirərək “Azərbaycanın kimya sənayesi işçilərində görmə orqanının vəziyyəti” mövzusunda doktorluq dissertasiyası yazıb. 1977-ci ildə ona tibb elmləri doktoru alimlik dərəcəsi verilib.
Gərgin və məhsuldar elmi fəaliyyətinə görə 1980-ci ildə “Əməkdar elm xadimi” fəxri adına layiq görülüb. Görkəmli alimin respublikanın iri sənaye müəssisələrində apardığı genişmiqyaslı elmi-tədqiqat işləri “Şin istehsalında gözün peşə patologiyası”, “Xroniki yod intoksikasiyası zamanı oftalmologiya” və “Yod sənayesində gözün peşə xəstəliyinin profilaktikası” kimi dəyərli monoqrafiyalarında əksini tapıb. 1981-ci ildə görmə orqanının peşə patologiyası sahəsində apardığı elmi-tədqiqat işlərinin uğurlu nəticələrinə və oftalmologiyanın inkişafına verdiyi töhfələrə görə ona keçmiş ittifaqın oftalmologiya sahəsində ən mötəbər mükafatı olan SSRİ Tibb Elmləri Akademiyasının M.İ.Averbax adına mükafatı verilib. O, həmin mükafata layiq görülən ilk qadın alim idi.
Zərifə Əliyeva 1983-cü ildə Azərbaycan Elmlər Akademiyasının həqiqi üzvü seçilib. O, həmçinin bir sıra dərs vəsaiti və monoqrafiyaların müəllifidir: “Kəskin virus konyunktivitləri”, “Keratitlər, gözün damarlı traktının, torlu qişanın, görmə sinirinin xəstəlikləri, kataraktalar”, “Qlaukoma və gözün hipertenziyası”, “Görmə orqanının zədələnməsi”, “Göz yaşı axmasının fiziologiya və histologiyası”, “Şəkərli diabetdə göz xəstəlikləri”, “Gözün mikrocərrahiyyəsi”, “Göz bəbəyi haşiyəsinin adaptasiya və müdafiə funksiyası” və sair. Alimin “Yaşaparıcı yolların fiziologiyası”, “Yaşaparıcı yolların cərrahi müalicəsi”, “Göz yaşı yollarının qoruyucu cərrahiyyə üsulları” və digər əsərləri bu gün də aktuallığını qoruyub saxlayır. O, iridodiaqnostika və iridoterapiya problemləri ilə də məşğul olub, bu sahəyə dair iki monoqrafiya hazırlayıb. Dünya miqyasında iridodiaqnostikaya aid kitabları ilk dəfə Zərifə Əliyeva yazıb.
Zərifə Əliyevanın həkimlik sənəti ilə bağlı bir fikri də diqqəti cəlb edir: “Həkim insanın ən doğma adamıdır. O, insanlardan özünü ayırmamalı, özünü sevən, laqeyd insan olmamalıdır”.
Akademik Zərifə Əliyeva həm də görkəmli ictimai xadim idi. O, keçmiş SSRİ Sülhü Müdafiə Komitəsinin üzvü, Azərbaycan Sülhü Müdafiə Komitəsi sədrinin müavini, Ümumittifaq “Bilik” Cəmiyyəti İdarə Heyətinin, Ümumittifaq Oftalmoloqlar Elmi Cəmiyyəti Rəyasət Heyətinin üzvü olub. Xalq yazıçısı Elmira Axundovanın “Zərifə və Heydər Əliyevlər - Əbədiyaşar məhəbbət” kitabında oxuyuruq: “Özü də çoxsaylı vəzifələrinin heç birinə qətiyyən formal yanaşmırdı. Məsələlərin müzakirəsində şəxsən iştirak edir, onların uğurlu həlli üçün bilik, qüvvə və enerjisini əsirgəmirdi.
Bu zaman çalışırdı ki, gündəlik həyatının işlə bağlı tərəfi heç bir halda qadın və ana kimi üzərinə düşən vəzifələri üstələməsin. Bəzən Zərifə xanım elmi və ictimai işlərin ailəsinə, övladlarına ayıra biləcəyi vaxtı əlindən aldığına görə özünü günahkar hiss edirdi”.
Zərifə Əliyevanın fəxri adları, elmi titulları, mükafatları olduqca çoxdur. Bu adların hər biri qürur, iftixar mənbəyidir. Amma bu adlar sırasında ən şərəflisi Ana adıdır. Zərifə xanım Ümummilli Lider Heydər Əliyevin siyasi xəttinin layiqli davamçısı Prezident İlham Əliyevin anasıdır.
Müasirlərinin dediyi kimi, Zərifə xanım qeyri-adi bir ana idi və övladlarına olan münasibət də xüsusi idi. Belə münasibətin bənzərini tapmaq çətindir. O, uşaqları sanki Ulu Tanrı tərəfindən bəxş olunan bir nur payı kimi qəbul edirdi. Özünə rəhm etmirdi, analıq borcunu yerinə yetirməkdə də özünə rəhmi gəlmirdi. Hərdən analar uşaqlarına olan məhəbbətdə elə yüksək dərəcələrə çatırlar ki, bununla hamını heyrətə gətirirlər. Zərifə xanım məhz belə analardan idi.
Azərbaycan Prezidenti İlham Əliyev aprelin 14-də Beynəlxalq Əmək Təşkilatının Baş direktoru Jilber Hunqbonu qəbul edib.
Görüşdə dövlət başçısının rəhbərliyi ilə ölkəmizdə əmək, məşğulluq, habelə əhalinin sosial rifah halının daha da yaxşılaşdırılması istiqamətində görülən işlər və əldə olunan uğurlar qeyd edilib.
Prezident İlham Əliyev torpaqlarımızın işğal altında olduğu dövrdə bütün infrastrukturun tamamilə məhv edildiyini xatırladaraq vurğulayıb ki, işğaldan azad olunmuş torpaqlarımızda aparılan bərpa və quruculuq işləri ilə yanaşı, həmin ərazilərə qayıdan insanların işlə təmin edilməsi ən vacib məsələlərdən biridir.
Dövlət başçısı bununla bağlı Beynəlxalq Əmək Təşkilatı ilə əməkdaşlığın əhəmiyyətini vurğulayıb.
Qəbula görə minnətdarlığını bildirən qonaq Azərbaycan ilə rəhbərlik etdiyi təşkilat arasında layiqli əmək üzrə 2 proqramın uğurla icra olunduğunu xatırladaraq, hazırda “2025-2029-cu illər üçün Layiqli Əmək üzrə Ölkə Proqramı”nın layihəsi üzərində işlərin davam etdirildiyini deyib.
Jilber Hunqbo Azərbaycanın DOST konsepsiyası modelinin öyrənilməsinin əhəmiyyətinə toxunub, sosial sahədə həyata keçirilən islahatlarla bağlı təcrübənin bölüşdürülməsinin vacibliyini vurğulayıb.
O, COP29 çərçivəsində ədalətli keçid üzrə səmərəli müzakirələrin aparıldığını deyib və bunun nəticəsi olaraq Avropa və Mərkəzi Asiya üzrə Regional İşçi Qrupunun yaradılmasını xüsusilə qeyd edib.
Jilber Hunqbo Beynəlxalq Əmək Təşkilatının sosial məsələlərlə bağlı Azərbaycanın inkişaf prioritetlərinə dəstək verəcəyini bildirib.
***
Azərbaycan Respublikasının Prezidenti İlham Əliyev aprelin 14-də Beynəlxalq Əmək Təşkilatının Baş direktoru Jilber Hunqbonu qəbul edib.
Azərbaycan Prezidenti İlham Əliyev Azərbaycan Şahmat Federasiyasının vitse-prezidenti Faiq Həsənova təbrik məktubu ünvanlayıb.
“Məktubda deyilir:
“Hörmətli Faiq müəllim!
Sizi 85 illiyiniz münasibətilə səmimi-qəlbdən təbrik edirəm.
Siz Azərbaycanda şahmatın inkişaf etdirilməsi, geniş təbliği və yeni nəsil şahmatçıların yetişməsi işinə mühüm töhfələr vermisiniz. Ölkəmizdə çoxsaylı şahmat yarışlarının uğurlu təşkilində böyük xidmətləriniz vardır.
Dünya şahmat ictimaiyyəti uzun illərdən bəri Sizi 150-dən artıq mötəbər beynəlxalq turnirdə, o cümlədən FİDE Qran-priləri, Ümumdünya Şahmat Olimpiadası və Dünya Kubokunda ədaləti qorumuş nüfuzlu baş hakim kimi tanıyır, təqdir edir və səmərəli fəaliyyətinizə ehtiramla yanaşır.
Azərbaycan şahmat məktəbinin inkişafına töhfələriniz dövlət tərəfindən yüksək qiymətləndirilmiş və Siz dəfələrlə təltiflərə layiq görülmüşsünüz.
Sizə bu əlamətdar gündə ən xoş arzularımı yetirir, uzun ömür və möhkəm cansağlığı arzulayıram”.