 |
|
Yaponiyanın paytaxtı Tokio şəhərində keçirilən Azərbaycan Respublikası ilə Yaponiya arasında iqtisadi əməkdaşlıq üzrə Dövlət komissiyasının 10-cu iclasında iştirak edən Azərbaycan Dəmir Yollarının nümayəndələri Yaponiyanın biznes dairələrinin nümayəndələri ilə də bir sıra görüşlər keçiriblər.
“Azərbaycan Dəmir Yolları” QSC-nin sədr müavini İqbal Hüseynov, “ADY Express” və “ADY Conteiner” MMC-lərin rəhbərləri Tokioda 10-dan artıq iri yük sahibləri və loqistik şirkətlərinin rəhbər heyətləri ilə danışıqlar aparıblar.“JR-Freight Railway”, “HİS Corporation”, “Yusen Logistics”, “Nippon Freight Railway Co”, “Nissin Corporation”, “Toyo Trans Corporation”, “İTOCHİ Cooperation”, “JETRO”, kimi iri biznes nümayəndələri ilə yanaşı, Azərbaycan dəmir yollarının nümayəndə heyəti Yaponiyanın Torpaq, İnfrastruktur və Nəqliyyat nazirliyində də maraqlı görüşlər keçiriblər.
Aparılan danışıqlarda Azərbayacanla Yaponiya arasında nəqliyyat, logistika və dəmir yolları vasitəsi ilə yükdaşımalar sahəsində əməkdaşlıq məsələləri əsas müzakirə mövzusu olub. Bakı-Tbilisi-Qars dəmir yolunun istifadəyə verilməsi və Azərbaycan dəmir yollarının, “Transsibir daşımaları üzrə Koordinasiya Şurası” beynəlxalq assosiasiyanın tamhüquqlu üzvü olduqdan sonra Uzaq Şərq regionu və regionun aparıcı ölkələrindən olan Yaponiyadan, Türkiyə, Cənubi Avropa və Balkan ölkələri, eyni zamanda aralıq dənizi hövzəsi ölkələrinə yüklərin nəqli məsələsi diqqəti cəlb etməyə başladı. Azərbaycan dəmiryolçularının təklif etdiyi marşrut, Yaponiya-Rusiya-Azərbaycan-Gürcüstan-Türkiyə-Avropa marşrutu. Belə ki, yüklər Yaponiyadan bərələr vasitəsi ilə, Rusiyanın Vladivostok şəhərinə, oradan isə dəmir yolu, Transsibir magistralı ilə, hərərkət ediləcək. Rusiyadan sonra yüklərin Azərbaycana, Gürcüstana və Bakı-Tbilisi-Qars dəmir yol xətti ilə Türkiyəyə və daha sonra Avropaya nəqli təklif edildi. Təkçə ötən il ərzində, Transsibir magistralı ilə daşınan tranzit yüklərin 30 faizi Yaponiyadan nəql olunan yüklərin payına düşüb. Bu xəttə yük qatarlarının sürəti sutkada 1100 km olduğundan, və yaxın zamanlarda sürətin daha da artırılacağını nəzərə alaraq, Azərbaycan dəmiryolçularının təklifləri bir sıra üstünlüklərinə görə Yaponiya biznes dairələri tərəfindən maraqla qarşılanıb. Azərbaycanın təşəbbüskarı olduğu, yeni nəqliyyat marşrutunun – “Şimal – Qərb” dəhlizinin, digər marşrutlarla müqayisədə əsas üstünlüyü tranzit məsafəsinin və tranzit vaxtının iki-üç dəfə az olmasıdır. Hazırda Vladivostok-Bakı-Avropa marşrutu ilə yüklərin nəqli 21 günə həyata küçirmək mümkündürsə, Süveyş kanalı vasitəsi ilə həmin yüklərin daşınması 45 günə mümkündür. Yaxın gələcəkdə magisrtalda sürət artıqca, Şimal-Qərb marşrutu ilə yüklərin nəqlini 17 günə həayata keçirmək mümkün olacaq. Nəzərə alınsa ki, Yaponiya ilə Avropa Birliyi arasında illik yük dövriyyəsi 15 mln tondan artıqdır, Azərbaycan ərazisindən keçən nəqliyyat marşrutuna həmin yüklərin bir qismini cəlb etmək mümkün olacaq.
Tokioda aparılan danışıqlarda, yüklərin nəqli mexanizmləri, tariflər, tranzit vaxtı və digər mühüm məsələlər müzakirə olunaraq, əlaqələrin yaxın zamanlarda davam etdirilməsinə dair qərarlar qəbul olunub. Görüşlərdə qarşılıqlı maraq doğuran digər məsələlər ətrafında da fikir mübadiləsi aparılıb.
Sürücülərin 3-cü dairəvi yolla hərəkətlərini davam etdirmələrini xahiş olunur
"Bakı-Salyan yolunun “Bibiheybət” kimi tanınan məsafəsinə yaxın olan ərazidə sürüşmə olduğu üçün avtomobilin hərəkətinə məhdudiyyət qoyulub. Nəqliyyatın təhlükəsiz hərəkətini təmin etmək üçün sürücülər alternativ yollara yönləndirilir.
Xüsusilə bütün yük avtomobilləri Bakı-Salyan yolunun 14-km-liyindən mərkəzə doğru hərəkəti tamamilə məhdudlaşdırılıb".
Yol-xeber.az xəbər verir ki, bunu Bakı Şəhər Dövlət Yol Polisi İdarəsinin bölmə rəisi, polis polkovniki Vaqif Əsədov deyib.
Vaqif Əsədov bildirib ki, nəqliyyat vasitələri 3-cü kənar dairəvi yol vasitəsilə Yasamal rayon ərazisindən keçməklə hərəkətə davam edə biləcək:
"Bu əraziyə yaxın yerlərdə yaşayan sürücülər üçün müvafiq yol nişanları qoymaqla onların təhlükəsiz hərəkəti təmin ediləcək. Dövlət Neft Şirkətinin bu ərazidə olan fəaliyyətində istifadə etdiyi texniki vasitələrin də hərəkət istiqaməti təyin edilib. Onlar 20-ci sahə dairəsindən və ya Bayıl qəsəbə daxilindən keçməklə hərəkətə davam edə biləcəklər. Hazırda vəziyyəti nəzərə alaraq sürücülərdən paytaxt istiqamətindən mərkəzə doğru hərəkət edərkən 3-cü dairəvi yolla hərəkətlərini davam etdirmələrini xahiş edirik".
Vətəndaşlar bundan əziyyət çəkir
Bakıda daha bir yol bərbad vəziyyətdədir. Yol-xeber.az xəbər verir ki, bu barədə sosial şəbəkələrdə video paylaşılıb. Prezident İlham Əliyevin hətta qəsəbə və kəndlərin daxilində yolların təmir olunması ilə bağlı göstərişi olsa da nədənsə bu yola tərəf baxan yoxdur. Səbəb barədə isə müxtəlif versiyalar səsləndirirlir. Bəziləri deyir ki, yol AAYD-nın balansında deyil. Digər tərəfdən yerli bələdiyyənin balansında pul olmadığı əsas gətirirlir. Vətəndaşlar isə düşünürlər ki, bu iki bazarın rəhbərliyi arasında olan rəqabətdən irəli gəlir. Bazarlar arasında vətəndaşlar normal hərəkət etməsinlər deyə yol illərdir bu vəziyyətdə qalıb. Yəqin ki, əsl səbəbi aidiyyəti qurumlar açıqlayar. Videonu təqdim edirik:
Gömrük Komitəsinin ayrıca qurum kimi qalması məntiqsizlikdir və ölkə iqtisadiyyatı üçün ziyanlıdır
“Gömrük Komitəsi növbəti dəfə məntiqsiz, öz fəaliyyətlərinin nədən ibarət olduğunu hələ də anlamadığını və ya anlamaq istəmədiyini sübut edən açıqlama yayıb”. “Yeni Sabah.az” xəbər verir ki, bunu iqtisadçı ekspert Natiq Cəfərli deyib. O deyib ki, komitə açıqlama yayaraq ölkəyə xarici nömrə ilə maşınların daxil olub 90 gün qalma icazəsindən sui-istifadə edənlər var və buna görə də bu məsələyə nəzarəti gücləndirəcəyini bildirib: “Azərbaycan müstəqillik qazanandan sonra iş adamlarına, vətəndaşlara dağ çəkmək üzrə lider olan qurum həmişə Gömrük Komitəsi olub. Çünki, hökumət də, Komitə rəhbərləri də bu günə qədər Gömrük orqanlarının fəlsəfəsini anlaya bilmirlər. Gömrük orqanları tarixən daxili bazarı qorumaq, daxili istehsalçılara dəstək olmaq üçün yaradılan qurum olub. Amma Azərbaycanda hələ də bu prinsip işə düşməyib, Gömrük Domokl qılıncı kimi biznesin, vətəndaşın başı üzərində asılmış, ən çox korrupsiyaya uğramış qurumlardan biridir.
Azərbaycan avtomobil istehsal etmir, əvvəl Şamaxı və Naxçıvanda, indi də Nefçalada mənasız maşın yığımı ilə məşğul olan zavodlar olub. Dəfələrlə qalstuklu müəllimlərə başa saldıq ki, avtomobil istehsalı adlandırmaq üçün maşının detallarının ən azı 25%-i ölkəmizdə istehsal olunmalıdı. Bizdə isə yerli olan ancaq maşınların təkərinə vurulan havadı – vəssalam, qalan bütün detallar valyuta ilə xaricdən alınır, dollar xaricə axır, vintaçan ilə yığılan maşınları isə ancaq dövlət büdcəsi hesabına satırlar – yəni, dövlət ikiqat ziyan görür, həm büdcə pulu hesabına yığım sexləri açılıb adına avtomobil istehsalı deyirlər, həm dövlət büdcəsi hesabına həmin keyfiyyətsiz maşınları alırlar, həm də həmin büdcə manatı sonra dollara çevrilib xaricə gedir.
Paralel olaraq da Azərbaycan hökuməti avtobobillərə yüksək rüsum, aksiz vergisi qoyur, hələ bir ƏDV də alır. Şanlı Gömrük Komitəsi isə vətəndaşların xaricdən aldıqları maşınlara qanuni yazılmış qaimələri tanımır, özlərindən hoqqa çıxardıb maşınlara yüksək qiymət qoyub rüsum və vergiləri öz bildikləri kimi hesablayırlar.
Məzlum vətəndaş da məcbur qalıb gedir Gürcüstandan maşın alır, gürcü nömrəsi ilə ölkəyə daxil olur, hər 3 aydan bir də sərhədi keçib bir də qayıdır – bu sui-istifadə halı deyil, Gömrüyün yaratdığı rəzalətə vətəndaşın qanuni cavabıdır.
Bu gün Azərbaycan hökuməti Gömrük rüsumları və vergiləri vasitəsi ilə hər maşından istehsalçı ölkədən daha çox pul qazanır. Rusiya büdcəsi hər Ladadan cəmi 600 dollar qazandığı halda bizim hökumət bundan 3 qat artıq büdcəyə pul toplayır. Ya da yazıq “nemes” mühəndisi maşın düşünür, fəhləsi istehsal edir, amma Almaniya büdcəsi bir (məsələn) Mersedesdən maksimum 2000 avro qazanırsa, bizim hökumət əlini ağdan-qaraya vurmadan hər Mersedesdən ortalama 6000-7000 min manat pul qazanır. Budur Gömrük siyasətinin fəlsəfəsi?!
Biz dəfələrlə təklif etmişik ki, heç olmasa hibrid avtomobillər üçün rüsumları sıfırlayın, ƏDV-ni ləğv edin, bir neçə ay öncə Gömrük Komitəsinin rəsmisi yenə bəyan etmişdi ki, belə etsək bu sui-istifadə hallarına səbəb olacaq, camaat daha çox hibrid gətirəcək. Adam anlamır ki, elə məqsəd də budur ki, camaat daha çox hibrid avtomobilləi gətirsin, ölkənin avtoparkı yenilənsin, ekologiyaya müsbət təsiri olsun. Bax belə insanlar Gömrüyü idarə edirlər və bərk-bərk yapışıblar ki, Komitə ləğv edilməsin, amma edilməlidir.
Gömrük Komitəsinin ayrıca qurum kimi qalması məntiqsizlikdir və ölkə iqtisadiyyatı üçün ziyanlıdır”.
Uçqunun 80-100 metr ərazini əhatə etdiyi bildirilib
Ötən gün Bakı-Salyan yolunun Bibiheybət məscidinin yaxınlığındakı yolda baş verən sürüşmə ilə əlaqədar olaraq araşdırmalar davam etdirilir. Yol-xeber.az xəbər verir ki, bu barədə "Report"un çəkiliş qrupu həmin ərazidə olub və reportaj hazırlayıb.
Azərbaycan Avtomobil Yolları Dövlət Agentliyinin (AAYDA) Mətbuat Xidmətinin rəhbəri Anar Nəcəfli və Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin Geoloji planlama ekspedisiyasının rəisi “Report”a açıqlama verib.
Qeyd edək ki, noyabrın 24-ü axşam saatlarında paytaxtın Bibiheybət ərazisində sürüşmə baş verib. Sürüşmə ilə əlaqədar olaraq Bibiheybət məscidindən paytaxt istiqamətinə yeni yolda hərəkət dayandırılıb. Hadisə nəticəsində yolun asfalt qatı dağılıb. Uçqunun 80-100 metr ərazini əhatə etdiyi bildirilib. Sürüşmə baş verən ərazinin yaxınlığında küçədə hərəkətsiz vəziyyətdə olan "Mercedes" markalı avtomobil uçqunun altında qalıb.
Sürüşmədən sonra hadisə yerinə gələn Baş Nazir Əli Əsədov, Bakı Şəhər İcra Hakimiyyətinin başçısı Eldar Əzizov, Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov, Fövqəladə Hallar nazirinin birinci müavini Rafael Mirzəyev və digər şəxslər əraziyə baxış keçiriblər.
Baş vermiş hadisə isə aidiyyəti üzrə araşdırılır
Bu gün saat 14:10-da "Azərbaycan Dəmir Yolları" QSC-nin Biləcəri-Heybət mənzilinin 521-ci kilometrindəki avtomobil körpüsündə yol-nəqliyyat hadisəsi baş verib. Yol-xeber.az xəbər verir ki, bu barədə qurumun açıqlamasında bildirilir.
Məlumatda həmçinin deyilir ki, AZ 99-SA-781/ AZ 99-ZE-781 dövlət qeydiyyat nişanlı, “Kamaz” markalı yük avtomobili körpünün üzərindən aşaraq dəmir yolu xəttinin üstünə düşüb. Sürücü Xəzər İnqilab oğlu Yusifli və onun sərnişini hadisə yerində dünyalarını dəyişiblər. Qəza nəticəsində dəmir yolunun hər iki istiqamətində kontakt şəbəkəsi və yan xətlər tam sıradan çıxıb və qatarların hərəkəti üçün bağlıdır. Qatarların hərəkətinin bərpa edilməsi istiqamətində iş aparılır. Baş vermiş hadisə isə aidiyyəti üzrə araşdırılır.
Xidmət bütün respublika üzrə davam etdiriləcək
Səyyar xidmət kampaniyası ilə Kənd Təsərrüfatı Nazirliyinin bütün qurumları zəhmətkeş insanlara yerində xidmət göstərir, problem və şikayətlərini operativ həll edir. Avtosfer.az xəbər verir ki, bu dəfə Kənd Təsərrüfatı Nazirliyi yanında Aqrar Xidmətlər Agentliyinin “Səyyar Xidmət” Qrupu Füzuli rayonu, 5 nömrəli Zobucuq qəsəbəsində etibarlılıq müddəti bitmiş, yararsız hala düşmüş traktor sürücüsü vəsiqələrinin qısa müddətdə dəyişdirilməsi, dövlət qeydiyyatına alınmayan texnikaların dövlət qeydiyyatına alınması, itirilmiş və ya xarab olmuş dövlət qeydiyyat şəhadətnasinin yenisi ilə əvəz edilməsi, nəqliyyat vasitələrinin dövlət texniki baxışından keçirilməsi xidmətlərini həyata keçirərək, vətəndaşlara yerindəcə xidmət göstərib.
Qeyd edək ki, xidmət bütün respublika üzrə davam etdiriləcək,
Yenilənmə işləri mütləq qaydada davam etdirilməlidir
Uzun müddətdir ki, yararsız vəziyyətdə olan 71 və 93 nömrəli müntəzəm marşrut xətti üzrə avtobuslar təmir olunan və nisbətən iritutumlu nəqliyyat vasitələri ilə əvəz olunub. Belə ki, hər iki marşrut xətti üzrə istismarda olan avtobusların texniki baxımdan yararsız olması, sərnişin tələbatını ödəməməsi, eləcə də, digər çatışmazlıqlar daim sərnişinlərin haqlı narazılığına səbəb olurdu. Bakı Nəqliyyat Agentliyindən Yol-xeber.az-a bildirilib ki, ötən dövrdə bununla əlaqədar, vətəndaşlar tərəfindən 141 Çağrı Mərkəzinə də çoxsaylı müraciətlər daxil olub. Vətəndaşlara rahat və təhlükəsiz sərnişindaşıma xidmətinin göstərilməsi, eyni zamanda, buna mane olan halların qısa vaxtda aradan qaldırılması ilə bağlı hər iki xətt üzrə daşıyıcıya ciddi xəbərdarlıq edilib. Bildirilib ki, yenilənmə işləri mütləq qaydada davam etdirilməli, sərnişindaşıma fəaliyyətləri Nazirlər Kabinetinin 04 mart 2019-cu il tarixli 73 saylı qərarı ilə təsdiq olunmuş tələblərə tam uyğunlaşdırılmalıdır.
Muğanlı-İsmayıllı yolu ilə bağlı ilkin layihə planının variantları işlənilir
Dövlət başçısının direktiv göstərişinə əsasən, Muğanlı-İsmayıllı avtomobil yolunun yenidən qurulması və ya yeni trassasının müəyyənləşdirilməsi məqsədi ilə ilkin layihə planının hazırlanması istiqamətində Azərbaycan Avtomobil Yolları Dövlət Agentliyi tərəfindən bir sıra işlər görülür. “Azərbaycan Avtomobil Yolları” Dövlət Agentliyinin İctimaiyyətlə əlaqələr şöbəsindən Yol-xeber.az-a bildirilib ki, bu işlər çərçivəsində yerli layihəçilərlə birlikdə ilkin layihə variantlarının hazırlanması, mükəmməl layihə planlaşdırılmasının həyata keçirilməsi üçün analoji ərazilərdə yol, körpü, tunel, mühəndisi qurğuların layihələndirilməsi təcrübəsinə malik olan Avstriyadan dəvət olunmuş “Ste.p ZT GmbH” mühəndislik bürosunun nümayəndələri ilə Agentlikdə işgüzar görüş keçirilmiş, müzakirələr aparılıb.
Mövcud Muğanlı-İsmayıllı avtomobil yolunun yenidən qurulması və ya yeni trassasının müəyyənləşdirilməsi məqsədi ilə ilkin layihə planının variantlarının işlənməsi məqsədi ilə geoloji və geotexniki tədqiqatların (yolun keçəcəyi güzərgahın müəyyənləşdirilməsi, ərazinin geoloji şəraitinin və dinamikasının öyrənilməsi üçün sondaj quyularının qazılması və s.) aparılmasına qərar verilib.
Muğanlı-İsmayıllı avtomobil yolu paytaxtımızı İsmayıllı, Qəbələ, Oğuz, Şəki, Qax, Zaqatala və Balakən rayonları ilə birləşdirən ən qısa yoldur. Mürəkkəb relyef şəraitində tektonik hərəkətlərin baş verdiyi 9 ballıq aktiv seysmik zonada yerləşən, atmosfer sularının təsirindən sürüşməyə meylli gillicə qruntlarının üstünlük təşkil etdiyi dağ yamaclarından keçən mövcud yolda vaxtaşırı torpaq sürüşmələri baş verir. Hər il uzunluğu 40 km olan bu yolu sürüşmələrdən qorumaq üçün təmir-tikinti işləri aparılmasına, yol uçqunlarının təmizlənməsi və həmin hissələrin yenidən bərpası, qabion divarlarının inşası və s.tədbirlərə baxmayaraq, bu avtomobil yolu demək olar ki, hər il öz fəaliyyətini qısa və ya uzun müddətli fasilələrlə dayandırmalı olur.
Qeyd edək ki, “Ste.p ZT GmbH” mühəndislik bürosu Avstriyanın ən məşhur və ən böyük tikinti-mühəndislik şirkətlərindən biridir. Mülki mühəndislik və bina tikintisi, tunel, nəqliyyat infrastrukturu və planlanması, yol mühəndisliyi, geologiya və geotexnika mühəndisliyi, istismar və təhlükəsizlik texnologiyası və s. kimi mühəndisliyin bütün sahələri üzrə ən yüksək səviyyədə xidmətlər təklif edir.
70 illik təcrübəyə əsaslanmaqla hər hansı bir layihənin reallaşdırılması üçün tələb olunan bütün layihə-planlaşdırma xidmətlərinin həyata keçirilməsi üçün geniş imkanlara malikdir. Şirkətin əməkdaşları tərəfindən müştəri ilə birlikdə spesifikasiyalara və dizayn ideyalarına əsasən texnologiya, xərc və vaxt baxımından optimallaşdırılmış tikinti layihəsi fərdi olaraq hazırlanır, həmçinin ilkin layihələrin hazırlanması və ya planlaşdırması, tender üçün layihə cizgilərinin və layihə sənədlərinin tərtib olunması, işçi cizgilərin hazırlanması, optimal variantın seçilməsi və s. mühəndislik xidmətləri göstərilir.
Yağışlı havalarda su gölməçələrindən keçərkən ehtiyatlı olmağı unutmasınlar
Baş Dövlət Yol Polisi İdarəsi (BDYPİ) ölkə ərazisində müşahidə olunan hava şəraiti ilə əlaqədar sürücülərə müraciət edib. İdarənin Mətbuat Xidmətindən Yol-xeber.az-a bildirilib ki, Ekologiya və Təbii Sərvətlər Nazirliyinin verdiyi məlumata əsasən, bu gündən etibarən ölkə ərazisində hava şəraitinin kəskin dəyişməsi gözlənilir. Bununla əlaqədar olaraq yollarda yarana biləcək yol qəzalarının və digər xoşagəlməz halların qarşısının alınması üçün Baş Dövlət Yol Polisi İdarəsi sürücülərə müraciət edərək bildirir ki, avtomobil idarə edərkən daha diqqətli olsunlar, sürət həddini hava şəraitinə uyğun seçsinlər, kəskin tormozlama, zərurət olmadan ötmə və digər manevrlər etməkdən çəkinsinlər: "Yağışlı havalarda su gölməçələrindən keçərkən ehtiyatlı olmağı unutmasınlar.
Ölkənin bəzi dağlıq ərazilərində yolların buz bağlama ehtimalı olduğunu nəzərə alaraq, belə hava şəraitində sürücülük təcrübəsi az olan şəxslərdən sükan arxasına əyləşməmələri xahiş olunur.
Həmçinin, piyadalar da hava şəraitinin kəskin dəyişməsini nəzərə alaraq yollarda təhlükəsizlik tədbirlərinə daha ciddi riayət etməlidirlər. Piyadalara sutkanın qaranlıq vaxtı və ya məhdud görünmə şəraitində yola çıxarkən əlvan geyimlərə üstünlük verməyi, yolu özlərinə və digər hərəkət iştirakçılarına təhlükə yaratmadan keçməyi tövsiyə edərdik".