Son illərdə Fransada kriminal vəziyyət xeyli pisləşib və indi ölkədə təhlükəsiz yer qalmayıb.

Bu xəbərdarlığı Fransa ədliyyə naziri Gerald Darmanin “Legend” onlayn media orqanına verdiyi müsahibədə qeyd edib: "İndi heç bir təhlükəsiz yer qalmayıb. Məsələn, narkotiklər həmişə olub, amma indi ən kiçik kənddə də kokain, kannabis haqqında bilirlər - narkotik əvvəllər yalnız böyük şəhərlərdə, metroda var idi. İndi bu fenomen metastaz verib və fransızlar üçün adi hala çevrilib. Yelisey çölünə çıxanda başa düşürsən ki, indi istənilən yerdə oğurluğa məruz qala bilərsən, çünki kütləvi yerlərdə oğrular rahat dolaşır”.

Onun sözlərinə görə, bu neqativ tendensiyalarla mübarizəyə “cəmiyyətdə texnologiya, vətəndaş azadlıqları haqqında paranoya” və şəxsi məlumatların kataloqlaşdırılması mane olur. Nazir hesab edir ki, sifətin tanınması texnologiyasından istifadə cinayətlə mübarizənin açarıdır. Nümunə olaraq nazir Dubay və Sinqapur təcrübəsinə istinad edib ki, artıq hava limanlarında belə texnologiyadan istifadə olunur.

Qeyd edək ki, Fransa 2024-cü il Olimpiya Oyunları zamanı küçələrdə və Olimpiya obyektlərində vəziyyətə nəzarət etmək üçün süni intellekt alqoritmlərindən istifadə edən sistemdən artıq istifadə etmişdi. Əvvəlcə sistemin yalnız olimpiada dövründə tətbiq edilməsi müzakirə edilsə də, sonda 31 mart 2025-ci il tarixinə qədər uzadıldı, daha sonra hökumət 18 mart 2025-ci il tarixdə Nəqliyyat Təhlükəsizliyi Aktına edilən dəyişikliklə mexanizmi 2027-ci ilin martına qədər uzatmağa cəhd etdi. Lakin aprel ayında Fransa Konstitusiya Şurası bu düzəlişi ləğv etdi.

Twitter