 |
|
Masallı rayon Çaxırlı kənd tam orta məktəbinin direktor vəzifəsinin icrası şəhid anası Mehriban Sultanoya tapşırılıb.
Bu barədə “Qafqazinfo”nun sorğusuna cavab olaraq Lənkəran-Astara Regional Təhsil İdarəsindən bildirilib.
Məlumatda qeyd olunub ki, hazırda Masallı şəhəri Rafiq Əlihəsənov adına 1 nömrəli tam orta ümumtəhsil məktəbinin direktor müavini olan M.Sultanovaya 8 yanvardan etibarən Çaxırlı kənd tam orta ümumtəhsil məktəbinin direktor vəzifələrinin icrası həvalə olunub.
Məlumat üçün bildirək ki, M.Sultanova 2023-cü ildə Masallı şəhər Rafiq Əlihəsənov adına 1 saylı tam orta məktəbinin direktoru vəzifəsindən uzaqlaşdırılmışdı.
Qeyd edək ki, Mehriban Sultanova Vətən müharibəsi şəhidi Niyaməddin Sultanzadənin anasıdır. N. Sultanzadə Füzuli və Cəbrayıl rayonları uğrunda gedən döyüşlərdə vuruşub və Qubadlı uğrunda gedən döyüşlərdə qəhrəmancasına şəhid olub. Prezidentin sərəncamı ilə ölümündən sonra “Vətən uğrunda” medalı ilə təltif edilib.
Azərbaycan dövləti tərəfindən əlilliyi müəyyən edilmiş şəxslərin və şəhid ailələrinin mənzil təminatının yaxşılaşdırılması üçün mütəmadi olaraq mühüm addımlar atılır. Bununla bağlı dövlət tərəfindən həyata keçirilən sosialyönümlü tədbirlər davam etdirilir.
Trend xəbər verir ki, bu istiqamətdə həyata keçirilən tədbirlər çərçivəsində daha bir rayonda - Zərdabda əlilliyi müəyyən edilmiş şəxslərə və şəhid ailələrinə yeni mənzillər veriləcək.
Belə ki, sözügedən rayonda 18 ədəd ikiotaqlı, 12 ədəd üçotaqlı mənzil əlilliyi müəyyən edilmiş şəxslərə və şəhid ailələrinə təhvil veriləcək.
Artıq bununla bağlı Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyi hazırlıq işlərinə başlayıb.
Agentlik sözügedən şəxslərin mənzillərlə təmin olunmasının 2,4 milyon manata başa gələcəyini proqnozlaşdırıb.
Qeyd edək ki, qurum daha öncə Neftçala, Saatlı və Salyanda da əlilliyi müəyyən edilmiş şəxslərin və şəhid ailələrinin mənzil təminatının yaxşılaşdırılması ilə bağlı müvafiq işlərə başlayıb.
Taksi ilə bağlı islahatlar 2024-cü ilin əvvəlində ciddi şəkildə qarşımızda duran məsələ idi.
Axar.az xəbər verir ki, bunu Rəqəmsal İnkişaf və Nəqliyyat Nazirliyinin bu gün keçirilən mətbuat konfransında Azərbaycan Yerüstü Nəqliyyat Agentliyinin (AYNA) İdarə Heyətinin sədri Anar Rzayev deyib.
O bildirib ki, taksilərdə orta yaş 7 ilə enib:
“Taksilərin şəhərdə eyni rəngdə olması müşahidə edilir. 2024-cü ilin dekabr ayını əvvəlki ilin müvafiq dövrü ilə müqayisə etdikdə, taksi sifarişlərinin sayında 32 faiz azalma müşahidə edilib. E-taksi sistemi formalaşdırılıb”, - sədr qeyd edib.
Bir neçə müddətdir ki, ölkədə hərarətlə müşayiət olunan xəstəlik artıq can almağa başlayıb. Belə ki, Zaqatalada xəstəxanaya gətirilən 2 yaşlı uşaq reanimasiyada ölüb. Yayılan xəstəlik insanlarda narahatlığa səbəb olub.
Maraqlıdır, bu xəstəliklə bağlı hökumət, parlament nə etməyi düşünür?
globalinfo.az-a danışan Səhiyyə komitəsinin üzvü, deputat Müşfiq Məmmədli deyib ki, qış aylarında orqanizmlərin spesifik xüsusiyyətinə uyğun olaraq virus infeksiyalarının yoluxma intensivliyi və tezliyi artır.
Onun sözlərinə görə, yoluxma fərqli aylarda ola bilər:
“Hazırda virus infeksiyaları ilə xəstələnmə intensivliyinin artmasını müşahidə edirik. İstər bütün dünyada, istərsə də Azərbaycanda analiz etdikdə nəticələri tam əminliklə söyləyə bilərik. Amma təbii ki, yuxarı tənəffüs yollarının virus infeksiyaları davamlı şəkildə mutasiyaya uğrama qabiliyyətinə malikdirlər. Lakin mutasiyaya uğrayan viruslar bir mövsüm daha az intensivliklə gedə bilər, sonra isə fərqli-fərqli ağırlaşmalar verə bilər. Hazırda yayılmış virus infeksiyasını müşahidə etdikdə, pnevmaniya ağırlaşmalarını vermə ehtimalının yüksək olduğunu görürük. Hətta bununla əlaqədar Səhiyyə Nazirliyinin müraciətində xüsusən qeyd olunur ki, gigiyenik tələblərə, əhalinin sıx toplaşdığı məkanlarda müəyyən bir məsafə qaydalarına əməl etmək və xüsusən də şəxsi gigiyena qaydalarına diqqət yetirmək lazımdır. Bunlar əsasən yaşlı, xroniki xəstəliyi olan şəxslər və uşaqlar üçün daha aktualdır”.
Deputat deyib ki, bu aktuallıq hər birimizin üzərində daha diqqətli olmaq kimi bir məsuliyyət formalaşdırmalıdır:
“Xəstələnmə əlamətləri müşahidə olunduqda həkimə müraciət edilməlidir. Simptomatik preparatlar qəbul etməklə, həkimin məsləhəti altında daha da ağırlaşma ehtimalının qarşısını almaq üçün zamanında müraciət edib, deyilənlərə əməl etməliyik. Dövlətin müvafiq strukturlarının bu istiqamətdəki fəaliyyətinə gəldikdə isə, təbii ki, hər zaman kəskin respirator infeksiyaların, xüsusən virus infeksiyalarının yayılma intensivliyi artdıqda müvafiq əks-epidemik tədbirlər həyata keçirilir. Səhiyyə Nazirliyinin müvafiq qurumları, TƏBİB-in tabeliyində olan müəssisələr, o cümlədən özəl sektorlarda da bu istiqamətdə addımlar atılır, sirkulyar məktublar, müvafiq təlimatlar göndərilir. Bundan başqa, maarifləndirmə, peyvəndlənmə, dezinfeksiya və s. tədbirləri həyata keçirilir”.
Müşfiq Məmmədlinin dediklərinə görə, hazırda Azərbaycanda epidemik vəziyyət nəzarət altındadır:
“Bilirsiniz ki, COVID-lə əlaqədar olaraq karantin rejiminin müddəlları da keçərlidir və dövlət bütün strukturları ilə istər prosesin qarşısının alınması, istərsə də lazım olduqda müvafiq əks-epidemik tədbirlərin intensivliyinin artırılması baxımından bu proseslərə tam hazırdır. Biz infeksiyon xəstəliklərin hansısa qeyri-adi formada yüksəlməsinin şahidi olarıqsa, təbii ki, bu tədbirlər də həyata keçiriləcək. Həmin o əks-epidemik tədbirlərin, karantin rejiminin tətbiqinin, dövlətin bu istiqamətdə atdığı addımların nə dərəcədə önəmli və strateji olduğunun əminliyi hər birimizdə formalaşmalıdır. Çünki Azərbaycan dövlətinin məqsədi öz vətəndaşlarının sağlamlığını qorumaqdır”.
Yanvarın 10-u saat 10:00-a olan faktiki hava açıqlanıb.
Milli Hidrometeorologiya Xidmətindən verilən məlumata əsasən, yanvarın 10-u saat 10:00-a olan məlumatına əsasən ölkə ərazisində hava şəraiti sabit, əsasən yağmursuz keçib.
Naxçıvan, Culfa, Naftalan, Şəmkir, Yevlax, Kürdəmir, Cəfərxan, Zərdabda duman müşahidə olunub, dumanda görünüş 500 metrədək məhdudlaşıb.
Havanın minimal temperaturu Bakıda və Abşeron yarımadasında 3, Aran rayonlarında 3 dərəcə şaxtadan 2 dərəcəyədək isti, Naxçıvan MR-da və dağlıq rayonlarda 8 dərəcəyədək şaxta qeydə alınıb.
Prezident İlham Əliyevin metro stansiyaları ilə bağlı çıxışından sonra hər kəsi bir sual maraqlandırır.
Yeni inşa olunacaq 10 yeni metro stansiyası paytaxtın hansı istiqamətlərində olacaq? Yeni stansiyaların nə vaxt istifadəyə verilməsi planlaşdırılır?
"Yol-xeber.az" Baku TV-yə istinadən xəbər verir ki, inşaat mühəndisi Azər Axundovun sözlərinə görə, bu 10 stansiya bənövşəyi xətdən Ağ Şəhərə, yaşıl xətdən isə "Həzi Aslanov" stansiyasına kimi uzadılacaq:
"B4" hazırda tikilməkdə olan stansiyadır. Heydər Əliyev İdman Kompleksinin arxasında yerləşir. "B5" stansiyası təxminən Xarici İşlər Nazirliyinin, "B6" stansiyasi isə "Hökumət evi"nin arxasında planlanır. Arada isə "Sahil" keçid stansiyası olacaq, o da "Sahil" stansiyasının yanında düşünülür. "B7" "Xətai" stansiyası ilə keçid, "B8" stansiyası da Ağ Şəhərin Babək prospekti hissəsinə tərəf düşən hissəsi olmalıdır. "Y15", "Y16", "Y17" stansiyaları da "Xətai" ilə "Həzi Aslanov" arasında 8 Noyabr prospekti boyunca yerləşəcək", - deyə o bildirib.
"Y14" stansiyası isə Ağ Şəhər ərazisinə düşür. Bununla da 2030-cu ilə qədər Bakıda stansiyaların sayı 37-yə çatdırılacaq.
Ətraflı süjetdə:
Azərbaycanda yanvarın 10-da hava şəraitinin əsasən yağmursuz keçəcəyi gözlənilir.
Bu barədə Milli Hidrometeorologiya Xidməti məlumat yayıb.
Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi gözlənilir. Mülayim cənub-şərq küləyi əsəcək.
Havanın temperaturu gecə 5-8° isti, gündüz 9-14° isti olacaq. Atmosfer təzyiqi 770 mm civə sütunundan 767 mm civə sütununa enəcək. Nisbi rütubət gecə 80-85%, gündüz 65-70% olacaq.
Azərbaycanın rayonlarında hava şəraitinin əsasən yağmursuz keçəcəyi, bəzi yerlərdə arabir duman olacağı gözlənilir. Mülayim qərb küləyi əsəcək.
Havanın temperaturu gecə 2° şaxtadan 3°-dək isti, gündüz 8-13° isti, dağlarda gecə 3-8° şaxta, gündüz 3-8° isti olacaq.
“Ölkə Prezidenti cənab İlham Əliyev yanvarın 7-də yerli televiziya kanallarına verdiyi müsahibəsində istər ötən ildə əldə olunmuş uğur göstəriciləri, istərsə də qarşıda duran yeni vəzifələr barədə detallı açıqlamalar təqdim olunmuşdur. Düşünürəm ki, həm yerli, həm də xarici ictimaiyyətin diqqətini cəlb edən önəmli məqamlardan biri də möhtərəm dövlət başçımızın Azərbaycanın dünyada yüksək nüfuza sahib olan D-8 İslam ölkələri birliyinə üzv qəbul edilməsi ilə bağlı səsləndirdiyi fikirlər oldu”.Bu sözləri mətbuata verdiyi açıqlamasında Milli Məclisin deputatı Kamaləddin Qafarov deyib.
Millət vəkilinin fikrincə, bu təşkilat bundan sonra D-9 adlandırılacaq, çünki məhz Azərbaycan bu quruma üzv olan doqquzuncu ölkə oldu. “Məlumdur ki, ölkəmiz bir sıra beynəlxalq təşkilatlarla sıx əməkdaşlıq edir, həmin təşkilatların üzvüdür və bu proses də davam edir. Keçən ilin dekabr ayının 19-da isə Azərbaycan D-8-ə üzv qəbul edildi. Bununla da həmin təşkilat demək olar ki, 30 ildən sonra Azərbaycanla öz sırasını genişləndirdi. Cənab Prezident bununla bağlı səsləndirilən sualı cavablandırarkən birmənalı olaraq vurğuladı ki, bu, bizim üçün növbəti uğurlu addım oldu. Çünki Azərbaycanın bu təşkilata qəbul edilməsi ölkəmizin nüfuzunu bir daha göstərir. D-8 müsəlman ölkələrini birləşdirən ən böyük təşkilatdır. Azərbaycan həmişə müsəlman aləminin dəyərli üzvü olmuşdur. O cümlədən, İslam Əməkdaşlıq Təşkilatının rəhbərlərinin açıqlamalarından da hər zaman bu qənaətə gəlmək olur ki, bu təşkilat da bütün dövrlərdə Azərbaycanla bağlı çox müsbət fikirdə olub. Azərbaycan daim bir çox müsəlman ölkələrinə yardımlar edib. Cənab Prezident İlham Əliyevin yeni dünya nizamının formalaşması fonunda Türk Dövlətləri Təşkilatının, eləcə də D-8-in dünya miqyasında ciddi güc mərkəzinə çevrilə biləcəyi barədə dedikləri isə, birmənalı olaraq, bütün Türk və İslam dünyasını həmrəyliyə çağıran ciddi mesajdır.”
Fikirlərini davam etdirən K.Qafarov daha sonra cənab Prezident İlham Əliyevin yeni dünya nizamının formalaşması prosesində Azərbaycanın rolu ilə bağlı səsləndirdiyi fikirlərin önəmini vurğulayaraq deyib: “Dövlətimizin başçısı birmənalı olaraq bildirdi ki, biz bu prosesin fəal iştirakçısı olmalıyıq. Yəni Azərbaycan sadəcə burada yeni nizamın necə olacağını gözləməməlidir. Azərbaycan Cənubi Qafqazın aparıcı ölkəsidir və məsuliyyət baxımından da xüsusi çəkiyə malikdir. Yeni nizam ədalətli olmalıdır və bu, Azərbaycanın uzun illər apardığı siyasətə də uyğundur. Prezidentimiz İlham Əliyevin həyata keçirdiyi xarici siyasət xətti suverenlik, müstəqillik, bir-birinin işlərinə qarışmamaq, müxtəlif bəhanələrlə ölkələrin daxili vəziyyətini gərginləşdirməmək kimi prinsipial əsaslar üzərində qurulmuşdur. Ölkəmiz öz siyasətilə, sərmayə qoyuluşu ilə Cənubi Qafqazda faktiki olaraq, yeni nəqliyyat və energetika xəritəsini yaratmışdır. Bir tərəfi Xəzər üzərindən Orta Asiyaya, bir tərəfi Avropaya uzanan bu böyük coğrafiyada Azərbaycan faktiki olaraq əvəzolunmaz ölkəyə çevrilir. Bu gün müstəqil siyasət aparmaq iqtidarında olan ölkələr çox deyil. Buna görə də, möhtərəm dövlət başçımızın dediyi kimi, yeni dünya nizamı tam formalaşma prosesinə düşəndə Azərbaycanın mövqeyi də ən azı Cənubi Qafqazda və Xəzər hövzəsində nəzərə alınacaq və biz buna hazır olmalıyıq.”
Azərbaycanda hərbi xidmət çağırış və müddətli həqiqi hərbi xidmət keçməyə son yaş həddinin endirilməsinin tətbiqi üçün mexanizmlər hazırlanır.
Səfərbərlik və Hərbi Xidmətə Çağırış üzrə Dövlət Xidmətindən məlumat verilib.
Bildirilib ki, yeni mexanizmlər ictimaiyyətə açıqlanacaq.
Qeyd edək ki, “Report”a müraciət edən bir neçə vətəndaş, qüvvəyə minən müvafiq dəyişikliklərin hazırda hərbi xidmətdə olan 31-35 yaşlı şəxslərə şamil olunub-olunmayacağı haqqında sual ünvanlayıb.
Xatırladaq ki, Prezident İlham Əliyev hərbi xidmət haqqında müvafiq qanunlara edilən dəyişiklikləri 2024-cü il dekabrın 29-da təsdiqləyib. Həmin dəyişikliklərə əsasən, Azərbaycanda hərbi xidmətə çağırılanlar ilkin hərbi qeydiyyata alınmış və ya alınmalı olan müddətli həqiqi hərbi xidmət keçməmiş 18 yaşından 30 yaşınadək Azərbaycanın kişi cinsli vətəndaşları olacaq. Qanun təsdiqlənənə qədər həmin yaş həddi 18 yaşından 35 yaşınadək idi.
Həmçinin, müvafiq olaraq Azərbaycan Silahlı Qüvvələrinin müddətli həqiqi hərbi xidmət qulluqçularının xidmət keçmək üçün son yaş həddi 36,5-dən 31,5-ə endirilib.
Bakının Nərimanov rayonunda yerləşən məşhur “Şuşa” restoranının sökülməsi ilə bağlı yeni məlumatlar yayılıb.
musavat.com xəbər verir ki, restoranın sahiblərinə Əhmədlidə yerləşən, üç böyük zalı olan “Leyla” şadlıq evi alternativ olaraq təklif edilib.
Restoranın sökülmə səbəbləri
“Şuşa” restoranı və ətrafdakı obyektlərin sökülməsi qərarı, Nərimanov Rayon İcra Hakimiyyətinin açıqlamasına görə, bir neçə səbəbə əsaslanır. Bildirilib ki, restoranın yerləşdiyi ərazi park statusuna malik olsa da, illər əvvəl qeyri-qanuni şəkildə özəlləşdirilib və sənədləşdirilib. Əlavə olaraq, parkdakı ağaclara lazımi qulluq göstərilməməsi, tonqalların nəzarətsiz qalanması və yanğın təhlükəsinin yaranması sakinlərin narazılığına səbəb olub. Bu problemləri nəzərə alaraq, restoranın sökülməsi və parkın abadlaşdırılması qərara alınıb.
ADA Universitetinin böyük layihəsi
Restoranın sökülən ərazisində ADA Universitetinin baş planına uyğun genişmiqyaslı layihə həyata keçiriləcək. Layihəyə əsasən, parkın ərazisi yenidən qurularaq həm böyüklər, həm də uşaqlar üçün əyləncə və istirahət imkanları yaradılacaq. Eyni zamanda, burada İtaliya-Azərbaycan Universiteti fəaliyyət göstərəcək. Universitetin inşasının artıq son mərhələyə çatdığı və bu il açılış mərasiminin keçiriləcəyi bildirilir.
Şəhriyar Parkında yenidənqurma işləri
Layihə çərçivəsində Şəhriyar Parkında da yenidənqurma işləri aparılır. Parkın yay aylarında sakinlərin istifadəsinə verilməsi planlaşdırılır. Ərazidə 4 nömrəli şəhər poliklinikasının tarixi binasının bərpası və Firidun bəy Köçərli adına Respublika Uşaq Kitabxanasının park ərazisinə köçürülməsi də nəzərdə tutulub.
Sahibkarın narazılığı
“Şuşa” restoranının sahibi Elxan Qasımovun qızı sökülmənin onların xəbərsiz aparıldığını mətbuata bildirib. O deyib ki, restoran tam sökülüb. Söküntü işləri aparılan zaman tərəflər arasında mübahisə də yaşanıb. Söküntünü aparan şəxslər mülk sahiblərinin çəkiliş aparmasına mane olmağa çalışıb.
Nərimanov Rayon İcra Hakimiyyətindən verilən məlumata görə, sahibkara alternativ obyekt təklif edilib, lakin o, bundan imtina edib. Eyni zamanda, sahibkarın mülkiyyət hüquqlarının pozulması faktı təsdiqlənərsə, qanun çərçivəsində kompensasiya ödəniləcək.
“Şuşa” restoranının ərazisinin yenidənqurma planları həm şəhər sakinləri üçün yeni istirahət imkanları, həm də ADA Universiteti üçün müasir təhsil mərkəzinin yaradılmasını nəzərdə tutur.