 |
|
Los-Ancelesin şimalında yeni meşə yanğınları başlayıb.
Yanğın yanvarın 22-də səhər saatlarından başlayıb. Bir neçə saat ərzində yanğın 39 kv. km. ərazini əhatə edib.
Yanğının yayılma təhlükəsi ilə əlaqədar hakimiyyət orqanları Kastaik gölünün ətrafındakı ərazilərində yaşayan 50 insanın məcburi təxliyəsini elan edib.
Milli Meteoroloji Xidmətin məlumatına görə, güclü külək alovun yayılmasına kömək edir. Yanğın əhalinin sıx məskunlaşdığı əraziləri təhdid edir.
Qeyd edək ki, yanvarın 7-də Los-Anceles dairəsində başlayan meşə yanğınları ştat tarixinin ən böyük yanğınları hesab olunur. Həmin yanğınlar nəticəsində ən azı 25 nəfər ölüb.
Tramp administrasiyasının qərarından sonra Gürcüstanda “Xarici təsirin şəffaflığı haqqında” qanun aktuallığını itirə bilər.
Teleqraf.com xəbər verir ki, bu barədə hakim “Gürcü Arzusu” partiyasının parlament çoxluğunun lideri Mamuka Mdinaradze brifinqdə bildirib.
Onun sözlərinə görə, bu qanuna Gürcüstanda ehtiyac olmaya bilər.
“Xarici təsirin şəffaflığı haqqında” qanun mütləq idi. Trampın ilk qərarlarından biri bunu təsdiqlədi”, - M.Mdinaradze qeyd edib.
Xatırladaq ki, ABŞ prezidenti Donald Trampın imzaladığı ilk fərmanlardan biri digər ölkələrə bütün yardım proqramlarının 90 gün müddətinə dayandırılması haqqında olub.
Gürcüstanda etirazlara səbəb olan, Avropa İttifaqı və ABŞ-nin tənqid etdiyi sözügedən qanun ötən ilin avqustun 1-dən qüvvəyə minib.
Qanunla maliyyələşməsinin 20%-ni xaricdən alan qeyri-hökumət təşkilatlarının qeydiyyatı tələb olunur.
Donald Trampın ABŞ prezidenti postuna qayıdışından sonra İran Zəngəzur dəhlizinin açılmasının qarşısını ala bilməyəcək.
Teleqraf.com xəbər verir ki, bunu erməni politoloq Artur Xaçikyan deyib.
Onun fikrincə, bu vəziyyətdə Ermənistana artacaq təzyiq Zəngəzur dəhlizinin açılmasına imkan yaradacaq.
“Türkiyə və Azərbaycan lobbisi Tramp administrasiyası ilə fəal işləyir, Ermənistanda belə iş görə biləcək peşəkar kadrlar yoxdur. Diaspor nümayəndələri Ermənistanın Tramp üçün heç bir hərbi-strateji əhəmiyyətinin olmadığını bildirirlər. ABŞ-nin regionda birinci müttəfiqi Azərbaycanla ittifaqda olan İsrail, ikincisi isə Türkiyədir” , - Xaçikyan əlavə edib.
Ekspert bildirib ki, bu yaxınlarda Vaşinqtonla İrəvan arasında imzalanmış strateji tərəfdaşlıq haqqında sənəd Ermənistanın təhlükəsizliyi ilə bağlı ABŞ qarşısında heç bir öhdəliyi özündə ehtiva eləmir: “Bu, “yeni Sevr müqaviləsi”dir və bunun sayəsində Ermənistan Rusiya və İranla münasibətləri korlayacaq. Artıq regionda dörd düşmənimiz olacaq”.
Politoloq hesab edir ki, Ermənistan hakimiyyətinin siyasəti ölkədə enerji tariflərinin kəskin artmasına, əhəmiyyətli ixrac bazarları və transferlərin itirilməsinə gətirib çıxara bilər. O, Ermənistanda aclığın başlaya biləcəyini istisna etməyib. Xaçikyanın sözlərinə görə, artıq Rusiya bu nəticələrlə bağlı xəbərdarlıq edib.
O, güman edir ki, Tramp ABŞ-ni Ukrayna münaqişəsindən çıxarmaq və resursları Yaxın Şərqə yönəltmək istəyir, çünki İsrailin müdafiəsi onun xarici siyasətinin mütləq prioritetidir:
“İrana hücum edilə bilər və ya Birləşmiş Ştatlar Tehranı güzəştə getməyə və nüvə proqramını məhdudlaşdırmağa, habelə İranın Yaxın Şərqdəki proksilərinə yardımının qarşısını almaq üçün sərt tədbirlərə əl atacaq. Bunlar olmasa, İrana hücum başlayayacaq. ABŞ-nin yeni administrasiyası hesab edir ki, İran məsələsini həll etməyin vaxtı çatıb. İsrail uzun illərdir bu fürsəti gözləyirdi. Hesab edirəm ki , Qəzza zolağında “Hizbullah”la döyüşlər bərpa olunacaq.
İranın başı üzərində qara buludlar yığılır: ya nüvə proqramını məhdudlaşdırmaqla güzəştə getməli, ya da hava hücumu ilə üzləşməlidir. Bu halda Tehran reaksiya verəcək ki, bu da gözlənilməz və təhlükəli eskalasiyaya gətirib çıxaracaq, o cümlədən bizim üçün”.
ABŞ-da prezident Donald Trampın andiçmə mərasimindən dərhal sonra qorxuya düşmüş “qoca qitə”də hökm sürən əsas siyasi-strateji tezis “Avropalılar nəhayət ki, öz təhlükəsizliklərini qorumağı artıq öyrənməlidirlər” məzmunu daşıyır... Halbuki, Avropa Birliyi ölkələri çox gecikiblər, çünki Ağ Evin yeni sahibinin avropalılara öz güclərinə inanacaq qədər zaman tanıyacağı və onlara ABŞ-a qarşı müqavimət imkanı verəcəyi qətiyyən inandırıcı görünmür...
"Yeni Müsavat" xəbər verir ki, ABŞ prezidenti Donald Trampın Ağ Evə ikinci dəfə gəlişi dünyada böyük rezonans doğurub. Belə ki, beynəlxalq məkanda indi əksər siyasi iradə mərkəzləri məhz Ağ Evin yeni sahibinin ABŞ-da hakimiyyətə gəlməsi ətrafında ciddi müzakirələr aparırlar. Əsas məsələ də ondan ibarətdir ki, bundan həm narahat, həm də məmnun olanlar mövcuddur. Üstəlik, narahatlıqla məmnunluq arasdında da o qədər uzaq məsafə yoxdur. Və bu, o deməkdir ki, prezident Donald Trampın siyasi mesajları onun gələcək strateji planları barədə hələ aydın təsəvvürlər yaratmaq üçün qətiyyən yetərli olmayıb.
Ona görə də, hesab etmək olar ki, prezident Donald Trampın Ağ Evə dönüşü hələ uzun müddər ciddi müzakirələrə və mübahisələrə səbəb ola bilər. Belə ki, onun ABŞ-da hakimiyyətə gəlişindən məmnun olanlar artıq buna ciddi əsasların olduğuna o qədər də əmin deyillər. Bu baxımdan, bütün dünyanın olduqca qəliz bir mərhələyə sürətlə yaxınlaşdığı indi o qədər də ciddi şübhə doğurmur. Hər halda, yalnızca andiçmə mərasimi ilə qlobal rezonansa səbəb olan prezident Donaldın zaman keçdikcə, öz fəaliyyəti ilə dünyanı daha çox silkələyə biləcəyi qətiyyən şübhə doğurmur. Və ABŞ-ın əsas qlobal rəqiblərinin indi yeni təhlükəli çağırışlara hazırlaşmağa üstünlük vermələri də artıq gözlənilməz xarakter daşımır.
Onu da qeyd edək ki, prezident Donald Tramp yalnız ABŞ-ın ənənəvi hərbi-siyasi rəqiblərini narahat etmir. Ağ Evin yeni sahibinin ikinci hakimiyyət başlanğıcından əndişə keçirən beynəlxalq siyasi iradə mərkəzləri sırasında ABŞ-ın müttəfiqləri də yer alır. Xüsusilə də əksər NATO ölkələri, eləcə də Avropa Birliyi prezident Donald Trampın ehtimal olunan hərbi-siyasi hədəflərinin kollektiv Qərb üçün real təhlükəyə çevrilə biləcəyini istisna etmirlər. Bu səbəbdən də, Qərb ölkələri müəyyən mənada, “qlobal siyasi fövqəladə vəziyyət” elan etmiş kimi görünürlər. Və yaxın gələcəkdə prezident Donald Trampın idarə etdiyi ABŞ-la siyasi qarşıdurmanın qaçılmaz ola biləcəyi qənaətinə çox yaxındırlar.
Maraqlıdır ki, Qərb mətbuatı da hazırda tədricən prezident Donald Trampın hədəfə alınmasına yönəlik beynəlxalq təbliğat kampaniyasına start verməyə başlayıb. Üstəlik, bu təbliğat kampaniyasının Avropa Birliyi və NATO daxilindən sifariş edilmiş ola biləcəyi də qətiyyən istisna deyil. Böyük ehtimalla Ağ Ev sahibinin aqressiv və proqnozlaşdırılmayan davranışlarına qarşı indidən müqavimət immunitetinin yaradılmasına ehtiyac duyulmaqdadır.
Yəni, hesab etmək olar ki, prezident Donald Tramp hakimiyyətə gələr-gəlməz özünə qarşı çoxsaylı “siyasi düşmənlər ordusu” yaratmağa nail olub. Və onların bir çoxunun zaman keçdikcə, Ağ Evin müttıfiqindən ABŞ-ın yeni düşməninə çevrilmə ehtimalı da hazırda aktualdır.
Almaniyanın dünyaca ünlü “Der Spiegel” nəşri bütün dünyaya, eləcə də, Avropa Birliyinə xəbərdarlıq materialı dərc edib. Nəşr iddia edir ki, həm Avropa Birliyi, həm də dünyanın qalan hissəsi prezident Donald Trampın ikinci hakimiyyət dönəminə xüsusi illyüzaya qapılması tamamilə yanlış və yersizdir.
Çünki andiçmə mərasimindən sonra prezident Donald Tramp bəzi vədlərindən geri çəkildiyini biruzə verdi. Digər tərəfdən, sadiq qaldığı vədlərində isə daha da irəli getməyə çalışdı. Və bununla da, ABŞ prezidentinin öz hakimiyyəti dönəmində hansı addımları ata biləcəyini təxmin etmək demək olar ki, mümkün deyil.
“Der Spiegel” nəşri hesab edir ki, Avropa dövlətləri öz tarixi gücünü xatırlamalıdır və ABŞ-ın Tramp administrasiyasına münasibətdə qarşıdurma səviyyəsində müqavimətə hazır olmalıdır. Çünki prezident Donald Trampın andiçmədən sonra öz sərt riktorikasına düzəliş edəcəyini, daha sülhpərvər mövqeyə yönələcəyini düşünənlərin ümidləri çox qısa müddətdə boşa çıxmış oldu. Hər halda, Ağ Evin yeni sahibi indiyə qədər qarşıya qoyduğu hədəflərin hamısını reallaşdırmaq niyyətində tamamilə ciddi görünür. Və bu, o deməkdir ki, prezident Donald Tramp indiyə qədər ABŞ-Avropa Birliyi münasibətlərində ön planda olan ortaq hədəflər sistemini davam etdirməyə qətiyyən həvəsli deyil.
Indi yalnız Almaniya deyil, ümumiyyətlə, bəzi Avropa siyasi dairələri və analitik təhlil mərkəzləri Tramp administrasiya dönəmində ABŞ üçün beynəlxalq qaydalar və hüquq normaları böyük ehtimalla elə bir ciddi əhəmiyyət daşımayacağını vurğulayırlar. Çünki prezident Donald Tramp yalnız ABŞ-ın geostrateji maraqlarını qorumaq niyyətində olan dövlət başçısı kimi ölkəsinin tarixinə düşməyə qərar verib. Ona görə də, Ağ Evin yeni sahibi Avropa Birliyi ölkələrinin zəifliklərini ABŞ-ın hegemon gücünə çevirməyə çalışacaq. Və bununla da ABŞ prezidenti Donald Tramp “qoca qitə” ölkələrinə ABŞ-ın siyasi iradəsini qəbul etdirməyə cəhd göstərəcək.
Avropa Birliyi dövlətlərində prezident Donald Trampın dünya siyasi məkanına qayıdışı ilə yaranmış ümumi əhval-ruhiyyə həm pessimist, həm də aydın xarakter daşıyır. Belə ki, “qoca qitə”də hökm sürən əsas siyasi-strateji tezis “Avropalılar nəhayət ki, öz təhlükəsizliklərini qorumağı artıq öyrənməlidirlər” məzmunu daşıyır.
Halbuki, Avropa Birliyi ölkələri bunun üçün olduqca çox vaxt itiriblər və demək olar ki, gecikiblər. İndi onlar prezident Donald Trampa qarşı dolayısı ilə siyasi savaş açmaq məcburiyyətində qalsalar da, Ağ Evin yeni sahibinin avropalılara öz güclərinə inanacaq qədər zaman tanıyacağı isə qətiyyən inandırıcı görünmür.
Türkiyə prezidenti Rəcəp Tayyib Ərdoğan Kartalkayadakı qış turizm mərkəzində baş verən yanğında həyatını itirənlərin dəfn mərasimində iştirak etmək üçün Boluya gedib.
O, hoteldəki yanğında 14 ailə üzvünü itirən Gültəkin ailəsinin evinə gedərək başsağlığı verib.
Ərdoğan daha sonra ailənin 8 nəfərin cənazə namazına qatılıb.
Dəfn mərasimində iştirak edən prezident göz yaşına hakim ola bilməyib.
Ukraynanın təhlükəsizliyini təmin etmək üçün ən azı 200 min avropalı əsgər lazımdır.
Bunu Ukrayna prezidenti Volodimir Zelenski Davosda Dünya İqtisadi Forum çərçivəsində "reuters"ə müsahibəsi zamanı deyib.
Zelenski hesab edir ki, Rusiyanın Ukraynaya qarşı müharibəsindən sonra təhlükəsizliyi təmin etmək üçün ən azı 200 min avropalı sülhməramlıya ehtiyac var. "Əks halda təhlükəsizliyi təmin etmək mümkün olmayacaq", - o vurğulayıb.
Zelenskinin fikrincə, bu, Rusiya qoşunlarının yeni işğalının qarşısını alacaq xarici hərbçilərin sayıdır.
O əlavə edib ki, Rusiya silahlı qüvvələrinin sayı 1,5 milyon nəfərdir, Ukrayna ordusunun sayı isə bunun yalnız yarısıdır.
Ermənistan və Azərbaycan arasında Tavuş bölgəsi ilə sərhədin delimitasiyası üzrə işlərin başlanması və ya bərpa edilməsi haqqında razılaşma bütün aspektlər baxımından Azərbaycanın maraqlarına uyğundur.
Bunu Ermənistan parlamentinin deputatı Tiqran Abramyan deyib.
Onun sözlərinə görə, bu, bir daha onu sübut edir ki, diktə edən tərəf Azərbaycan oldu və Ermənistan güzəştə getdi.
Deputat hesab edir ki, burada əsas problem anklavlarla bağlı olan məsələdir və beynəlxalq hüquq anklavların Azərbaycana qaytarılmasına yaşıl işıq yandırır ki, bu da Ermənistanın maraqlarına uyğun deyil.
"Bütün bunlar Ermənistan hakimiyyətinin demarkasiya adı altında təqdim etdikləri Azərbaycanın tətbiq etdiyi güzəştdən və Azərbaycan ideyaları ilə həyata keçirilən kapitulyasiya prosesindən başqa bir şey deyil.
Onu da xatırlatmaq istərdim ki, Ermənistanla Azərbaycan arasında imzalanmış əsasnamənin problemli müddəalarından birində qeyd olunur ki, sərhədin hər hansı hissəsi razılaşdırılarsa, sərhədin bu hissəsi demarkasiya olunmuş sayılır və dəyişdirilə bilməz.
Azərbaycanın demarkasiya adı altında onun üçün vacib sayılan sərhəd hissələrini tələb etməsi və qəbul etməsi böyük narahatlıq doğurur. Nəticədə Azərbaycan istədiyini alacaq, Ermənistan isə əlavə ərazilər itirmiş olacaq", - erməni deputat deyib.
Qeyd edək ki, hazırda Azərbaycanın 4 anklav kəndi - Qazaxın üç (Yuxarı Əskipara, Bərxudarlı və Sofulu) və Sədərəyin Kərki kəndi Ermənistanın işğalı altındadır.
Xəbər verdiyimiz kimi, ötən gün Türkiyədə qış turizm bölgəsi olan Bolu Kartalkaya Xizək Mərkəzindəki otellərdən birində baş verən yanğında 76 nəfər həlak olub.
Ölkə.Az Türkiyə mətbuatına istinadla xəbər verir ki, "Grand Kartal" otelində yaşanan faciədən sonra bu ölkədə 1 günlük matəm elan edilib.
Hadisə nəticəsində ölənlərdən 14-nün eyni ailənin üzvləri olduğu məlum olub.
Belə ki, yanğın günü oteldə qonaq olan 238 nəfər arasında Türkiyə Hava Yollarının əmədaşı Zehra Sena Gültekin və ailəsi də olub.
Sena Gültekin məktəblər tətilə buraxıldığı üçün həyat yoldaşı, 3 uşağı və digər 9 ailə üzvü ilə birlikdə Kartalkayaya yollanıb.
Türkiyə mətbuatının yazdığına görə, yanğın nəticəsində sözügedən 14 nəfərin hamısı ölüb.
S.Gültekinin ysnğın bşladıqdan sonra anasına zəng edərək halallıq istədiyi üzə çıxıb.
ABŞ prezidenti Donald Tramp Ağ Evdə prezidentliyinin ikinci dövrünün ilk mətbuat konfransında xarici siyasətlə bağlı bir çox mövzuda qiymətləndirmələr edib.
Tramp Rusiya-Ukrayna müharibəsinin bitməsi istiqamətində də mövqeyini açıqlayıb.
O, prezident Vladimir Putinə hədələyici xəbərdarlıq edərək bildirib ki, Putin danışıqlar masasına əyləşməsə Rusiyaya yeni sanksiyalar tətbiq ediləcək.
Tramp Putinlə görüşəcəyini və ən qısa zamanda müharibənin bitməsi üçün çalışacağını bildirib.
Onu da əlavə edib ki, Zelenski də sülh istəyir: "Sülhü çox istəyirəm, amma tanqo üçün iki nəfər lazımdır. Nə olacağını görəcəyik. Nə vaxt istəsə, Putinlə görüşəcəyəm. Mən bu müharibənin bitməsini istərdim”.
Bu müharibədə iki ölkənin ümumilikdə 1 milyon 500 minə yaxın əsgər itirdiyini bildirən Tramp deyib ki, Rusiya 800 minə yaxın, Ukrayna isə 600-700 min əsgər itirib.
Ukraynaya silah tədarükünə gəlincə, Donald Trampın sözlərinə görə, bu məsələ nəzərdən keçirilir.
Təl-Əviv Rusiya istehsalı olan silahları Kiyevə ötürməyi planlaşdırır.
Bu barədə Ukraynanın İsraildəki səfirliyi “Facebook”da məlumat yayıb.
Məlumata görə, Ukraynanın səfiri Yevgeni Korniyçuk İsrail xarici işlər nazirinin müavini Şarren Haskel ilə görüşüb.
“Görüş zamanı səfir İsrail Müdafiə Qüvvələri tərəfindən Livanda və ya başqa yerlərdə İsrailin düşmənlərindən ələ keçirilən Rusiya istehsalı silahların Ukraynaya verilməsi təklifinə görə nazir müavininə minnətdarlığını bildirib”, - məlumatda deyilir.