 |
|
Türkiyənin "Fənərbağça" klubu Erol Bulutu baş məşqçi postundan istefaya göndərib.
Klubun rəsmi saytının məlumatına görə, 46 yaşlı mütəxəssislə müqaviləyə qarşılıqlı razılıq əsasında xitam verilib. Mövsümün qalan hissəsində komandaya idman direktoru Emre Belözoğlu rəhbərlik edəcək.
Daha sonra isə bu postun Almaniya millisini AVRO-2020-dən sonra tərk edəcək Yoahim Lövə tapşırılacağı bildirilir. Bu barədə "Bild" nəşri xəbər yayıb. Löv 1998/1999 mövsümündə də "sarı-lacivərdlilər"in baş məşqçisi olub.
Qeyd edək ki, Erol Bulut "Fənərbağça"ya 5 avqust 2020-ci ildə baş məşqçi təyin olunub. Hazırda bu komanda 30 oyundan 59 xalla 3-cü pillədə qərarlaşıb və bir oyun az keçirmiş lider "Beşiktaş"dan 5 xal geri qalır.
Azərbaycan 7 cüdoçusu bu gün Gürcüstanın paytaxtı Tbilisidə start götürəcək Böyük Dəbilqədə mübarizəyə başlayır.
60 kq çəki dərəcəsində çıxış edən Oruc Vəlizadə Oleq Veredıba (Ukrayna) ilə, eyni çəkidəki Kəramət Hüseynov Rodriqo Lopeslə (Portuqaliya) üz-üzə gələcək.
66 kq-dakı Yaşar Nəcəfov Orlando Polankonun (Kuba) müqavimətini qırmağa çalışacaq.
Qadınların yarışında isə 4 cüdoçu qüvvəsini sınayacaq. 48 kq-da Aişə Qurbanlı və Leyla Əliyava tatamiyə çıxacaq. Onlar müvafiq olaraq Marusa Stanqar (Sloveniya) və Gülkader Şentürk (Türkiyə) ilə görüşəcək.
52 kq çəki dərəcəsində Gültac Məmmədəliyeva Anjelika Delqadonun (ABŞ), Şəfəq Məmmədova isə Yasmin Cavadyanın (Böyük Britaniya) müqavimətini qırmağa çalışacaq.
Cüdoçuların hamısı mübarizəyə 1/16 finaldan qoşulacaq.
Qeyd edək ki, Böyük Dəbilqəyə martın 27-də yekun vurulacaq. Azərbaycan turnirdə 11 idmançı ilə təmsil olunur.
“İlk oyunumuz qrupun güclü komandasına qarşı olacaq. Yaxşı, gənc futbolçulardan təşkil olunmuş komandamız var. Hər biri keyfiyyətli, bizim üçün dəyərli oyunçulardır. Daha çox birlikdə oynamalıyıq. Bizə vaxt lazımdır”.
Bu fikirləri Azərbaycan millisinin baş məşqçisi Canni De Byazi DÇ-2022-nin seçmə mərhələsinin Portuqaliya ilə oyunu öncəsi mətbuat konfransında deyib.
İtaliyalı mütəxəssis rəqibin daha təcrübəli olduğunu bildirib: “Məşqlərdə üzərində çalışdıqlarımızı meydanda yerinə yetirməklə ilk xalımızı qazanmağa çalışacağıq. Portuqaliya yığması ilə oyunda onlara boşluq verməməliyik. Onların nəyə qadir olduqlarını bilirik. Oyunda passiv olmamalıyıq, qorxmamalıyıq. Bizim üçün çox çətin imtahan olacaq. Meydanda istədiyimizi reallaşdırsaq, yaxşı oyun nümayiş etdirə bilərik”.
“Sabah Ronaldonun “evində” oynayacağıq. Taktiki baxımdan maraqlı oyun olacaq. Necə hazırlaşdığımızı sabahkı oyunda görəcəyik", - deyə yığmamızın məşqçisi fikrini tamamlayıb.
İsveçrə millisinin və İtaliya "Yuventus"unun sabiq futbolçusu Ştefan Lixtştayner karyerasını bitirdikdən sonra Sürixdəki saat zavodunda təcrübəçi kimi işə başlayıb.
Bu barədə veteran müdafiəçi "20 Minuten" nəşrinə müsahibəsində deyib.
Lixtştayner bildirib ki, bu iş hər zaman onun xoşuna gəlib: "Ona görə də saatların necə işlədiyini, onları söküb-yığmağı öyrənmək qərarına gəldim. Ümid edirəm ki, çox şey öyrənəcəyəm. Bilirsiniz ki, İsveçrədə bu sahə üzrə səviyyə çox yüksəkdir".
Qeyd edək ki, Ştefan Lixtştayner ötən yay futbolla vidalaşıb.
PSJ-nin futbolçuları Anhel Di Mariya və Markinyosun evləri soyulub. “Qafqazinfo” xəbər verir ki, futbolçuların ailələri evdə olarkən cinayətkarlar mənzilləri qarət ediblər və onları girov götürüblər.
“Nant”la oyun zamanı parislilərin idman direktoru Leonardo klubun baş məşqçisi Maurisio Poçettinoya bu barədə məlumat verib. Di Mariya qarşılaşmanın 62-ci dəqiqəsində əvəzlənib və ailəsinin yanında olmaq üçün dərhal evə yola düşüb.
Qeyd edilir ki, polis hadisə ilə bağlı araşdırmaya başlayıb, klub iki oyunçuya və onların ailələrinə tam dəstəyini təklif edəcək.
Şahmat üzrə dünya çempionu Maqnus Karlsenin təşkil etdiyi Çempionlar Turunun IV mərhələsində bu gün daha 5 tur oynanılacaq.
Bununla da "Magnus Carlsen Invitational" adlanan yarışda ilkin mərhələyə yekun vurulacaq.
Azərbaycan təmsilçiləri Teymur Rəcəbov və Şəhriyar Məmmədyarov 1/4 finala vəsiqə uğrunda son 5 görüşə çıxacaq. Oyunlar Bakı vaxtı ilə saat 20:00-da start götürəcək.
Məmmədyarov XI turda ağ fiqurlarla rusiyalı Yan Nepomnyaşiyə, XII turda "qaralar"la onun həmyerlisi Sergey Karyakinə rəqib olacaq. XIII turda Azərbaycan dueli gerçəkləşəcək. 36 yaşlı qrossmeyster ağ fiqurlarla Teymur Rəcəbovu sınağa çəkəcək. XIV turda qara fiqurlar Argentina şahmatçısı Alan Piçotla üz-üzə gələcək Məmmədyarov XV turda isə "ağlar"la ABŞ-ı təmsil edən Uesli So ilə münasibətlərinə aydınlıq gətirəcək.
Rəcəbov XI turda qara fiqurlarla ispaniyalı David Antonu sınağa çəkəcək. 34 yaşlı qrossmeyster XII turda "ağlar"la isveçli Nils Qrandeliusla qarşılaşacaq. XIII turda qara fiqurlarla Məmmədyarova qarşı mübarizə aparacaq Rəcəbov XIV turda "ağlar"la Nepomnyaşiyə rəqib olacaq. O, XV turda isə "qaralar"la Rusiyanın digər təmsilçisi Karyakinlə qüvvəsini sınayacaq.
İkinci yarış günündən sonra Rəcəbov 4,5 xalla 11-ci, Məmmədyarov isə 4 xalla 12-ci sırada qərarlaşıb. Turnir cədvəlinə 8 xalla Aniş Giri başçılıq edir.
"Magnus Carlsen Invitational"
15 mart
XI tur
Şəhriyar Məmmədyarov - Yan Nepomnyaşi (Rusiya)
David Anton (İspaniya) - Teymur Rəcəbov
XII tur
Sergey Karyakin (Rusiya) - Şəhriyar Məmmədyarov
Teymur Rəcəbov - Nils Qrandelius (İsveç)
XIII tur
Şəhriyar Məmmədyarov - Teymur Rəcəbov
XIV tur
Alan Piçot (Argentina) - Şəhriyar Məmmədyarov
Teymur Rəcəbov - Yan Nepomnyaşi (Rusiya)
XV tur
Şəhriyar Məmmədyarov - Uesli So (ABŞ)
Sergey Karyakin (Rusiya) - Teymur Rəcəbov
Qeyd edək ki, "Magnus Carlsen Invitational" Azərbaycan Şahmat Federasiyasının dəstəyi ilə "Report" İnformasiya Agentliyinin feysbuk və yutub səhifələrində canlı yayımlanır. Üçüncü yarış günündə aparıcı, beynəlxalq qrossmeyster Vasif Durarbəylinin qonağı keçmiş Azərbaycan çempionu Şəhriyar Həsənov olacaq.
Xatırladaq ki, turnirin ümumi mükafat fondu 220 min ABŞ dollarıdır. Qalib şahmatçı 60 000, finalçı 40 000, 3-cü yerin sahibi isə 25 000 ABŞ dolları qazanacaq. Yarış martın 21-də yekunlaşacaq. Teymur Rəcəbov Çempionlar Turunun II mərhələsində qalib, III mərhələsində isə 3-cü yerin sahibi olub.
Bu gün şahmat üzrə dünya çempionu Maqnus Karlsenin təşkil etdiyi Çempionlar Turunun IV mərhələsi start götürəcək.
"Magnus Karlsen Invitational" adlanan yarışda Azərbaycanı bu dəfə iki şahmatçı - Teymur Rəcəbov və Şəhriyar Məmmədyarov təmsil edəcək. Turnir Bakı vaxtı ilə saat 20:00-da start götürəcək.
Onlar yarışın ilk günündə 5 rəqiblə üz-üzə gələcək. Şəhriyar Məmmədyarov I turda qara fiqurlarla Ermənistan təmsilçisi Levon Aronyanla qarşılaşacaq. O, II turda ağ fiqurlarla Daniil Dubov (Rusiya), III turda qara fiqurlarla Hikaru Nakamura (ABŞ) ilə görüşəcək. Təcrübəli qrossmeyster IV turda Yorden van Foresti ağ, (Niderland), 5-ci turda Maksim Vaşye-Laqravı (Fransa) qara fiqurlarla sınağa çəkəcək.
Teymur Rəcəbov ilk iki qarşılaşmasını ağ fiqurlarla keçirəcək. 34 yaşlı qrossmeyster müvafiq olaraq Aniş Giri (Niderland) və Alan Piçotla (Argentina) üz-üzə gələcək. Rəcəbov III turda Uesli So (ABŞ), IV turda isə Levon Aronyanla (Ermənistan) münasibətlərə aydınlıq gətirəcək. Dünya Kubokunun qalibi Soya qarşı qara, Aronyana qarşı isə qara fiqurlarla oynayacaq. Şahmatçı günün son görüşünü qara fiqurlarla Daniil Dubova (Rusiya) qarşı keçirəcək.
"Magnus Karlsen Invitational"
I tur
Levon Aronyan (Ermənistan) - Şəhriyar Məmmədyarov
Teymur Rəcəbov - Aniş Giri (Niderland)
II tur
Teymur Rəcəbov - Alan Piçot (Argentina)
Şəhriyar Məmmədyarov - Daniil Dubov (Rusiya)
III tur
Uesli So (ABŞ) - Teymur Rəcəbov
Hikaru Nakamura (ABŞ) - Şəhriyar Məmmədyarov
IV tur
Şəhriyar Məmmədyarov - Yorden van Forest (Niderland)
Teymur Rəcəbov - Levon Aronyan (Ermənistan)
V tur
Daniil Dubov (Rusiya) - Teymur Rəcəbov
Maksim Vaşye-Laqrav (Fransa) - Şəhriyar Məmmədyarov
Qeyd edək ki, "Magnus Karlsen Invitational" Azərbaycan Şahmat Federasiyasının dəstəyi ilə "Report" İnformasiya Agentliyinin feysbuk və yutub səhifələrində canlı yayımlanacaq. İlk yarış günündə aparıcı, beynəlxalq qrossmeyster Vasif Durarbəylinin qonağı şahmat üzrə Azərbaycan yığmasının keçmiş üzvü Zeynəb Məmmədyarova olacaq.
Xatırladaq ki, turnirin ümumi mükafat fondu 220 min ABŞ dollarıdır. Qalib şahmatçı 60 000, finalçı 40 000, 3-cü yerin sahibi isə 25 000 ABŞ dolları qazanacaq. Yarış martın 21-də yekunlaşacaq. Teymur Rəcəbov Çempionlar Turunun II mərhələsində qalib, III mərhələsində isə 3-cü yerin sahibi olub.
"Neftçi" klubunun heyətinə qatdığı yaponiyalı ulduz futbolçu Keysuke Honda Bakıya gəlib.
35 yaşlı yarımmüdafiəçi səhər saatlarında Azərbaycana çatıb.
Paytaxt təmsilçisinin tezliklə təcrübəli oyunçu ilə müqavilə imzalayacağı gözlənilir. Razılaşmaya əsasən, Honda mövsümün sonuna kimi "Neftçi"nin formasını geyinəcək. "Ağ-qaralar" onun sözləşməsinin müddətini yayda artıra bilər.
Qeyd edək ki, 98 dəfə Yaponiya millisininin formasını geyinmiş Keysuke Honda 37 qol vurub. O, İtaliya "Milan"ı ilə yanaşı, Niderlandın "Venlo" və "Vitess", Rusiyanın MOİK (Moskva), Meksikanın "Paçuka", Avstraliyanın "Melburn Viktori", Braziliyanın "Botafoqo" komandalarında da çıxış edib.
Ulduz futbolçunun son olaraq Portuqaliya "Portimonense" klubu ilə müqavilə bağlayıb. Lakin o azı 3 ay azad agent statusu daşımadığı üçün yerli futbol liqasının qərarına əsasən, meydana çıxa bilməyib və fevralın 11-də klubla yollarını ayırıb.
2021/2022 mövsümündə Azərbaycan Premyer Liqasında və avrokuboklarda iştirak üçün müraciət edən bütün komandaların adlarına aydınlıq gəlib.
Bu barədə AFFA Lisenziyalaşdırma qrupunun rəhbəri Sərxan Hacıyev məlumat verib.
Onun sözlərinə görə, Premyer Liqadakı 8 klubun hamısı UEFA-dan lisenziyanın əldə olunması üçün müraciət ünvanlayıblar. Hacıyev I Diviziondan isə 4 klubun əsas liqada oynamaq istəyi ilə sənədlərini təqdim etdiyini diqqətə çatdırıb: "Hazırda bu sənədlərlə tanışlıq və müxtəlif meyarlar üzrə yoxlanılma prosesi gedir. Premyer Liqadakı bütün klublar avrokuboklarda oynamaq istədiklərindən, avtomatik olaraq, gələn mövsüm də Premyer Liqada iştirak üçün müraciət etmiş sayılırlar".
Hacıyev I Diviziondakı hər 3 bölgə təmsilçisi - "Kəpəz", "Zaqatala" və "Turan Tovuz"un Premyer Liqada iştirak üçün müraciət etdiyini söyləyib. O, paytaxt komandaları "Qaradağ Lökbatan" və MOİK-dən hansının elitada oynamaq istədiyini açıqlamayıb: "Hazırda bütün klubların sənədlərinin yoxlanılma mərhələsidir. Müraciət etmələri o anlama gəlmir ki, sənədlərində problem yoxdur. Sənədləri təqdim etmək UEFA və Premyer Liqa lisenziyalarını rahatca almaq demək deyil. Bilmək olmaz ki, sənədlərində problem olacaq, ya yox".
Hacıyev lisenziya istəyən klubların müraciət vaxtının artıq yekunlaşdığını bildirib. Onun sözlərinə görə, müraciət edənlər digər lazımi sənədləri aprelin 10-dək təqdim etməlidirlər: "Onlar sənədlərini müxtəlif vaxtlarda göndərir, biz isə sənədləri yoxlayır, müəyyən düzəlişlər edir, klublara geri qaytarırıq ki, onlar çatışmazlıqları aradan qaldırsınlar. Bu prosedurun bitəcəyi aprelin 10-dan sonra sənədlər daha diqqətlə yoxlanılmağa başlanılacaq. Mayın ortalarınadək isə bütün sənədlərə Lisenziyalaşdırma Komissiyasının iclasında baxılacaq və müvafiq qərar veriləcək. Ötən il bu Komissiyanın iclası koronavirus pandemiyası səbəbindən iyunun 18-də keçirilib. Toplantı ilk dəfə idi ki, belə gec baş tutmuşdu. Bu il problem yaşanmasa, iclasın mayın ortalarınadək gerçəkləşməsi nəzərdə tutulub".
Lisenziyalaşdırma qrupunun rəhbəri həmçinin bildirib ki, bəzən Premyer Liqa üçün müraciət ünvanlamış klubun daha sonra sənədi təqdim etmədiyi hallara da rast gəlinib: "Öz təcrübəmizdə müxtəlif illərdə bir neçə dəfə belə hallar yaşanıb. Hansısa klub əvvəlcədən müraciət edib, lakin sonradan heç bir sənəd təqdim olunmayıb".
"Report"un araşdırması nəticəsində məlum olub ki, Premyer Liqada iştirak üçün müraciət edən digər klub "Qaradağ Lökbətan"dır. Beləliklə, I Divizion təmsilçilərindən yalnız MOİK əsas liqada mübarizə aparmaq istəməyib.
"Qaradağ Lökbatan" klubunun icraçı direktoru Bəbir Həsənov "Report"a açıqlamasında bildirib ki, Lisenziyalaşdırma Qrupuna müraciət etsələr də, hüquqi meyarlara görə problem yaşayırlar: "Düşünmürəm ki, sənədlərimizin hamısı yerli-yerindədir. Aprelin 10-dək hüquqi meyarla bağlı çatışmazlığın aradan qalxacağı real deyil. Problemimiz hüquqi meyarla bağlıdır, bəlkə də həll edilə bilər".
Qeyd edək ki, AFFA-nın icraçı vitse-prezidenti Elxan Məmmədov 2021/2022 mövsümündə Premyer Liqada 10 komandanın oynamasını ideal saydığını bildirib.
"Qarabağ"ın sabiq futbolçusu Maqaye Geyenin qanında kokain aşkarlanıb.
Bu barədə "Qafqazinfo" "Digisport"a istinadən xəbər verir.
Narkotik maddə qəbul etməkdə ittiham olunan Rumıniyanın "Dinamo" klubunun futbolçusunun qanında kokain "Styau" ilə kubok matçından sonra aşkarlanıb.
Məsələ ilə bağlı hələlik rəsmi açıqlama verilməyib.
Qeyd edək ki, Maqaye Qeye 2019/2020 mövsümündə "Qarabağ"ın heyətində 28 oyun keçirib və 8 qol vurub. O, ötən ilin oktyabrında "Dinamo"ya keçib.