Bu gün ümummilli lider Heydər Əliyevin Naxçıvan Ali Məclisinin sədri seçilməsindən 27 il ötür.

Axar.az xatırladır ki, 1991-ci il sentyabrın 3-də Naxçıvan Muxtar Respublikası Ali Məclisində keçirilən fövqəladə sessiyada Heydər Əliyev Ali Məclisin sədri seçilib. Onun Naxçıvan Muxtar Respublikası Ali Məclisinin sədri vəzifəsinə seçilməsi ölkənin taleyində böyük əhəmiyyətə malik hadisə idi.

H.Əliyev sədr olduğu müddətdə blokada şəraitində qalan Naxçıvanın müdafiə qabiliyyətini gücləndirib. 1991-ci il sentyabrın 7-də Ali Məclis Naxçıvan Muxtar Respublikası Dövlət Müdafiə Komitəsinin yaradılması haqqında qərar qəbul edib. Bu qərar Naxçıvanın müdafiə qabiliyyətinin gücləndirilməsi istiqamətində görülən işlərin başlanğıcı idi.

Naxçıvanda görülən işlərdən biri də Milli Ordunun yaradılması idi. Təsadüfi deyil ki, elə ilk milli hərbi paradımız 1992-ci il oktyabrın 9-da Naxçıvanda keçirilmişdi.

Bundan başqa, 1991-ci il dekabrın 16-da Ali Məclis tərəfindən “31 Dekabr Dünya Azərbaycanlılarının Həmrəylik və Birlik Günü haqqında” Qərarın qəbul edilməsi xüsusi önəm kəsb edirdi.

Heydər Əliyev həmin dövrdə xarici iqtisadi əlaqələrin qurulması sahəsində də mühüm addımlar atıb. 1992-ci il 22-25 martda Türkiyədə Baş nazir Süleyman Dəmirəllə Türkiyə Cümhuriyyəti tərəfindən Naxçıvan Muxtar Respublikasına maliyyə, iqtisadi və texniki yardım göstərilməsi barədə 100 milyon dollar məbləğində kredit ayrılması və hər il 100 tələbənin Türkiyədə təhsil almasını nəzərdə tutan birgə Əməkdaşlıq Protokolu imzalanıb. 1992-ci il 28 mayda Naxçıvanla Türkiyə arasında Araz çayı üzərində tikilmiş “Ümid” körpüsünün açılışı olub.

1992-ci il 22-26 avqustda Heydər Əliyev İran İslam Respublikasına səfər edib, Ali dini lider Ayətulla Xamenei və İran İslam Respublikasının Prezidenti Əli Əkbər Rəfsəncani ilə görüşüb. Bu səfərin nəticəsi olaraq, Naxçıvan Muxtar Respublikası ilə İran İslam Respublikası arasında müxtəlif sahələrdə əməkdaşlığa dair protokollar imzalanıb.

1992-ci ildə İran və Türkiyə ilə bağlanmış əməkdaşlıq müqavilələri əsasında, Sədərək, Culfa və Şahtaxtı keçid məntəqələri yaradılıb. Bundan əlavə, Naxçıvan şəhəri yaxınlığında İstilik Elektrik Stansiyası tikilib.

Heydər Əliyevin 1991-1993-cü illərdə Naxçıvandakı hakimiyyəti dövrü muxtar respublikanın tərəqqisinin başlanğıcı idi və bu inkişaf indi də yüksək templə davam etməkdədir.

Twitter