 |
|
Professor Nəsiman Yaqublunun qəzada ölməsi ilə bağlı cinayət işi başlanılıb.
Yol-xeber.az-ın məlumatına görə, Cəbrayıl Rayon Polis Şöbəsində Cinayət Məcəlləsinin 263.2-ci ( Yol hərəkəti və ya nəqliyyat vasitəsinin istismarı qaydalarının pozulması-ölümlə nəticələndikdə) maddəsi ilə istintaq aparılır.
Hadisə mərhum professor Zəngilandan qayıdarkən, Füzuli rayonunun Nüzgar kəndi ərazisində qeydə alınıb.
Xəbər verdiyimiz kimi, avqustun 25-də 19 radələrində tarixçi alim, deputatlığa namizəd Nəsiman Yaqublu vəfat edib.
Lent.az “Bioqrafiya” rubrikasında Nəsiman Yaqublunun həyatından bəhs edir.
- Nəsiman Yaqublu harada və nə zaman anadan olub?
Nəsiman Yaqublu 1962-ci il fevral ayının 22-də Zəngilan rayonunun Zəngilan kəndində anadan olub.
- Nəsiman Yaqublu harada təhsil alıb?
Zəngilan rayonunda orta təhsilini başa vurduqdan sonra Bakı Dövlət Universitetinin Jurnalistika fakültəsinə daxil olub. 1983-cü ildə təhsilini davam etdirmək üçün Rusiyaya gedib, Sankt-Peterburq Universitetinin Jurnalistika fakültəsində oxuyub. 1986-cı ildə Leninqrad Universitetini bitirdikdən sonra Bakıya qayıdıb.
- Nəsiman Yaqublunun karyerası barədə nə bilirik?
O, "Yazıçı" nəşriyyatında redaktor vəzifəsində çalışıb. 1990-cı ildə stalinizmin azərbaycanlı qurbanları haqqında "Ağrılı ömürlər" kitabını, 1991-ci ildə isə Azərbaycan Xalq Cümhuriyyəti və onun yaradıcısı olan Məhəmməd Əmin Rəsulzadə haqqında əsərini nəşr etdirib. 1992-ci ildə Xocalı faciəsi haqqında "Xocalı qırğını" kitabını yazıb və 30000 tirajla çap etdirib. Mətbuat tarixi və jurnalistika ilə bağlı da bir çox kitabın müəllifidir. 1993-cü ildən ömrünün sonuna qədər Bakı Dövlət Universitetinin Jurnalistika fakültəsində baş müəllim olaraq fəaliyyət göstərib. Tarixi və publisistik yazıları Azərbaycanda, Türkiyədə və Polşada çap edilib.
2001-ci ildə "Azərbaycan Milli İstiqlal mübarizəsi və Məhəmməd Əmin Rəsulzadə" mövzusunda namizədlik dissertasiyasını, 2014-cü ildə "Azərbaycan milli istiqlal mücadiləsi və mühacirət mətbuatı" mövzusunda doktorluq dissertasiyasını müdafiə edib. 2008-ci ildə Türkiyənin Ankara şəhərində Azərbaycan Xalq Cümhuriyyətinin yaradılmasının 90 illiyinə həsr edilən beynəlxalq konfransda, 2009-cu ildə Polşanın Varşava şəhərində Qafqaz mühacirlərindən Piradzeyə həsr edilən konfransda, 2015-ci ilin oktyabr ayının 26–29-da Polşanın Varşava Universitetinin Şərqi Avropanı Öyrənmə Mərkəzinin təşkil etdiyi Beynəlxalq Prometey konfransında iştirak edib.
Azərbaycan Yazıçılar Birliyinin və Azərbaycan Jurnalistlər Birliyinin üzvü idi.
- Nəsiman Yaqublu yazdığı kitablardan böyük qazanc əldə edirdi?
Kitablarının birinə yazdığı giriş sözündə kitablarının çapından qazanc əldə etmədiyini, hətta ev almaq üçün götürdüyü kreditin bir hissəsini əsərlərini çap etdirməyə sərf etdiyini yazıb.
- Nəsiman Yaqublu I Qarabağ döyüşlərində iştirak edib?
1993-cü ildə, Qarabağ Savaşında könüllü olaraq Azərbaycan ordusunda xidmətə başlayıb, daha sonra "Azərbaycan ordusu" qəzetinin Baş redaktoru vəzifəsində çalışıb.
- Nəsiman Yaqublu elmi işlərinə görə hansı mükafatları alıb?
Hacı Zeynalabdin Tağıyev adına Milli Mükafatın və Həsən bəy Zərdabi Mükafatının laueratı olub.
- Nəsiman Yaqublu deputatlığa namizədliyini vermişdi?
Bəli. Həm də dəfələrlə.
2000-ci il parlament seçkilərində Nəsiman Yaqublu Müsavat Partiyasının proporsional seçki üzrə vahid namizədlər siyahısında partiya daxili keçirilmiş praymerizə əsasən 12-ci sırada olub.
Müsavat Partiyası proporsional seçkilər üzrə 140 546 səs (ümumi səslərin 4,85%-i) toplamış, lakin 6%-lik seçki həddini keçə bilmədiyi üçün mandat qazana ,deputat seçilə bilməmişdi.
Nəsiman Yaqublu 2006-cı il təkrar parlament seçkilərində Müsavat Partiyasının 44 saylı Sumqayıt-Abşeron seçki dairəsi üzrə deputatlığa namizədi olmuşdu
Nəsiman Yaqublu 2010-cu il parlament seçkilərində AXCP-Müsavat Seçki Blokunun vahid namizədi və Müsavat Partiyasının üzvü olaraq 125 saylı Zəngilan-Qubadlı seçki dairəsi üzrə deputatlığa namizəd olmuşdu.
Nəsiman Yaqublunun 2015-ci il parlament seçkilərində Müsavat Partiyasının namizədi olaraq 125 saylı Zəngilan-Qubadlı seçki dairəsi üzrə deputatlığa namizədliyi irəli sürülsə də, dairə seçki komissiyası onun namizədliyini qeydə almamışdır. O, Mərkəzi Seçki Komissiyasına qərarla bağlı şikayət etsə də, şikayəti təmin olunmamışdı
Nəsiman Yaqublu 2020-ci il parlament seçkilərində 24 saylı Nizami birinci seçki dairəsi üzrə Müsavat Partiyasının deputatlığa namizədi olmuşdur.[15] O, 352 səs səs toplayaraq deputat seçilə bilməmişdi.
Nəsiman Yaqublu Müsavat Partiyası Divanının 12 iyul 2024-cü ildə növbədənkənar iclasında alınan qərarla partiyanın 2024-cü il növbədənkənar parlament seçkilərində 125 saylı Zəngilan-Qubadlı seçki dairəsi üzrə deputatlığa namizədi olmuşdu.
Tarixçi-professor Nəsiman Yaqublu Zəngilan-Qubadlı dairəsindən deputatlığa namizəd olub və Zəngilandan seçicilərlə görüşdən qayıdan zaman yol qəzasına düşüb.
- Nəsiman Yaqublu hansı şəraitdə həlak olub?
Nəsiman Yaqublu 25 avqust 2024-cü ildə Cəbrayıl rayonu ərazisində idarə etdiyi "Nissan" markalı avtomobillə hərəkətdə olan zaman idarəetməni itirərək maşını yol kənarına aşırıb və nəticədə müxtəlif dərəcəli bədən xəsarətləri alaraq xəstəxanaya çatdırılıb. O, xəstəxanada vəfat edib.
Onun ölümündən xəbər tutan Məhəmməd Əmin Rəsulzadənin nəvəsi, hazırda Fransada yaşayan Rais Rəsulzadə göz yaşlarını saxlaya bilməyib, "O mənim canım ciytərim idi” deyərək ağlayıb. Rais Rəsulzadə ilə Nəsiman Yaqublunun dostluğu alimin M.Ə.Rəsulzadə barəsində kitab yazdığı illərdə başlayıb.
Tarixçi-professor Nəsiman Yaqublu bu gün Zabrat qəbiristanlığında dəfn olunacaq.
Bu barədə "Report"a onun yaxınları məlumat veriblər.
Bildirilib ki, dəfn mərasimi saat 13:00-14:00 üçün nəzərdə tutulub.
Xatırladaq ki, Bakı Dövlət Universitetində müəllim işləyən Nəsiman Yaqublu tarixçi-professordur. O, Zəngilan-Qubadlı dairəsindən deputatlığa namizəd olub və Zəngilandan seçicilərlə görüşdən qayıdan zaman yol qəzasına düşüb.
Bakı şəhəri, Suraxanı rayonu, Hövsan qəsəbəsində yerləşən "50 qəpik" avtoyuma məntəqəsində dəhşətli hadisə baş verib.
Publika.az-ın məlumatına görə, dostu ilə birgə velosipedini yumağa gedən 2010-cu il təvəllüdlü Rəşad Babayevi elektrik cərəyanı vurub. Yeniyetmə hadisə yerində dünyasını dəyişib.
Faktla bağlı Suraxanı Rayon Prokurorluğunda Cinayət Məcəlləsinin 124.1-ci (ehtiyatsızlıqdan adam öldürmə) maddəsi ilə cinayət işi açılıb. Obyektin sahibi təqsirləndirilən şəxs qismində cəlb edilib.
Araşdırmalar zamanı məlum olub ki, 13 yaşlı Rəşad dostu ilə su şlanqını dartarkən cərəyan vurub.
Yeniyetmənin dostu hadisəni belə təsvir edib: "Rəşadı əvvəllər tanımırdım, Hövsanda yaşamırdı, bir neçə gün idi ki, babasıgildə qonaq idi, arabir küçəyə çıxıb bizimlə oynayırdı. Mən bəzən öz velosipedimi yumaq üçün evimizdən bir qədər kənarda yerləşən "50 qəpik" deyilən avtoyuma məntəqəsinə gedirdim. Həmin gün velosipedi yumaq üçün evdən çıxanda Rəşadla görüşdüm, hara getdiyimi soruşdu. Velosiped yumağa getdiyimi dedim. O da mənimlə getmək istədi. 50 qəpik pulu aparata atıb velosipedi özüm yuyan zaman, Rəşad şlanqı əlimdən alaraq velosipedi özü yumaq istədi. İkinci dəfə isə şlanqı əlimdən alıb yenidən yumağa çalışanda, onu elektrik cərəyanı vurdu. Mən şlanqın plastik hissəsindən tutduğum üçün cərəyan mənə təsir etmədi, lakin Rəşad metal hissədən tutduğu üçün onu vurdu. Rəşad yerə yıxıldı və tanımadığım bir adam köməyə gəlib, şlanqı ayağı ilə kənara itələdi. Mən isə qaçaraq Rəşadın anasına xəbər verdim".
Suraxanı Rayon Məhkəməsinin hökmü ilə obyektin sahibi Cinayət Məcəlləsinin 124.1-ci maddəsi üzrə təqsirli bilinib və qazancından dövlət nəfinə 15 faiz pul tutulmaqla, 2 il müddətinə islah işləri cəzasına məhkum edilib.
Tanınmış meyxanaçı Rəşad Dağlının narkotik alverçiləri barəsində dediyi meyxana həbsxanada müzakirəyə çıxarılıb.
Bu barədə meyxanaçı ilə eyni həbsxanada olmuş və hazırda azadlıq olan şəxs Nail Kəmərlinin yutub səhifəsinə bildirib.
Onun sözlərinə görə, həbsdə olan narkotik alverçiləri heç də Rəşad Dağlının tənqidi meyxanasını müsbət qarşılamayıblar. Məhz bu meyxanaya görə Rəşad Dağlıya etirazlar olunub.
Azərbaycan ərazisində bugünədək meymunçiçəyi xəstəliyinə şübhəli hallar qeydə alınmayıb.
Bu barədə Səhiyyə Nazirliyi məlumat yayıb.
Bildirilib ki, bu istiqamətdə Ümumdünya Səhiyyə Təşkilatının tövsiyələrinə əsasən ciddi epidemioloji nəzarət aparılır, yoluxmaya şübhəli şəxslərin aşkarlanması, diaqnostikası və müalicəsi üçün müvafiq resurslar mövcuddur.
Qeyd edilib ki, meymunçiçəyi çox nadir hallarda rast gəlinən zoonoz virus xəstəliyidir, yəni bu xəstəlik insana əsasən heyvandan keçir.
Xəstəliyin inkubasiya dövrü 5-21 gün arasında dəyişə bilər. Xəstəlik adətən 2-4 həftə davam edir. Başlanğıc dövründə qeyd edilən kataral əlamətlər (hərarət, şiddətli başağrı, limfa düyünlərinin böyüməsi) sonradan səpgi dövrünə keçir. Səpgilər eyni inkişaf mərhələsində olmaqla bütün bədəni əhatə edir. Bir neçə gün davam edən səpgi eyni vaxtda qartmaq əmələ gətirməklə, yerində çapıq toxumasının əmələ gəlməsi ilə sağalır.
Məlumatda bildirilib ki, infeksiya insandan insana uzunmüddətli sıx təmas nəticəsində tamlığı pozulan dəri və selikli qişalar vasitəsilə ötürülür. Xəstəliyə xas olan kliniki əlamətlər əmələ gəlməyənə qədər xəstə və ya onunla təmasda olan şəxslər yoluxucu hesab edilmir.
"Xəstəlik adətən özünüməhdudlaşdıran xüsusiyyətə malikdir, yəni ağırlaşmayan hallar heç bir müalicə olmadan sağalır. Əksər xəstələrdə meymunçiçəyi yüngül formada keçdiyi üçün, simptomatik müalicə kifayət edir", - deyə nazirlik məlumat yayıb.
Bakıda vəzifəli şəxsin meyiti tapılıb.
İqtisadiyyat.az-ın məlumatına görə, meyit Nəsimi rayonu ərazisində aşkar olunub.
Meyitin 1979-cu il təvəllüdlü Sədi Zöhrablıya məxsus olduğu məlum olub. Məlumata görə, onun meyiti icarəyə götürdüyü obyektdə aşkar olunub.
Mərhumun "Atasığorta” şirkətində departament direktoru vəzifəsində çalışdığı bildirilib.
Qeyd edək ki, S.Zöhrablının atası Fail Məmmədov Azərbaycanın Əməkdar həkimidir və uzun müddət cərrah kimi çalışıb.
Faktla bağlı araşdırma aparılır.
İrandan Azərbaycana 7 kq-dan çox narkotikin keçirilməsinin qarşısı alınıb.
Bu barədə Dövlət Sərhəd Xidmətindən məlumat verilib.
Bildirilib ki, avqust ayının 15-də saat 00:50-də Dövlət Sərhəd Xidmətinin Sərhəd Qoşunlarının “Göytəpə” sərhəd dəstəsinin xidməti ərazisində keçirilmiş sərhəd axtarışı və əməliyyat tədbirləri nəticəsində ümumi çəkisi 7 kiloqram 710 qram narkotik vasitə marixuananın qaçaqmalçılıq yolu ilə İran İslam Respublikasından Azərbaycan Respublikasına keçirilməsinin qarşısı alınıb.
Fakt üzrə əməliyyat-istintaq tədbirləri davam etdirilir.
Qusarda bir neçə gündür itkin düşən 43 yaşlı Ramik Əhmədovun meyiti tapılıb.
“Qafqazinfo” xəbər verir ki, R.Əhmədovun üzərində zorakılıq əlamətləri olan meyiti rayonun Hil kəndində aşkar edilib. Onun odlu silahdan açılan atəşlə öldürüldüyü bildirilir.
Əldə etdiyimiz məlumata görə, Ramik Əhmədov FHN-in Dövlət Yanğından Mühafizə Xidmətinin Qusar Rayon Şöbəsində işləyib.
Faktla bağlı cinayət işi açılıb, əməliyyat-axtarış tədbirləri həyata keçirilir.
“Yaroslavl Broyler”in idarə heyətinin sədri Elman Əzizov özünə keçirdiyi qeyri-adi doğum günü etməsi xəbərləri ilə gündəmə gəlib.
Ölkə.Az xəbər verir ki, buna səbəb biznesmeninin doğum gününə qatılanların qədim Misir üslubunda geyinməsi olub.
Qonaqlıqda E.Əzizovun firon obrazında arabada olması və onun qullar kimi geyindirilmiş şəxslər tərəfindən daşınması birmənalı qarşılanmayıb.
Sosial şəbəkə istifadəçiləri fotolarda işçilərin heç xoşbəxt görünmədiyini, işini itirmək qoruxusu ilə heç nə deyə bilmədiklərini yazıblar.
Fotolardan birində divarda “Elman” adı və iş adamının atasının adının baş hərfi “N” (Nazifoviç) hərfi əks olunub.
Şirkət isə çoxsaylı tənqidlərə görə açıqlama verib. Fotoların “Yaroslav Broyler”də keçirilən “Müəssisəsə günü”nə aid olduğunu bildirib. Qeyd edilib ki, bu il müəssisənin yarandığı gün İdarə Heyətinin sədri Elman Nazifoviç Əzizovun doğum gününə təsadüf edib.
Sözügedən tədbirdə işçilərin öz təşəbbüsü ilə Elman Əzizova sürpriz hazırladığı bildirilib.
“İldə bir dəfə, hər il belə bir bayram hazırlayırıq. Fabrikdə çoxlu istedadlı insanlar var və onlar iştirak etməkdən və öz ideyalarını təklif etməkdən məmnundurlar. Ən əsası isə çalışırıq ki, təbrik hissəmiz Elman Nazifoviç üçün sürpriz olsun, ona görə də aylar boyu hazırlıq zamanı təbrikin bütün təfərrüatlarını gizli saxlayırıq. Və hər dəfə onun sürprizimizə reaksiyasını böyük həyəcanla gözləyirik. Bu il biz qədim Misir mövzusunu rənglərinə və təntənəsinə görə seçdik. Təbii ki, ad günü adamı həmişə bizim təşəbbüsümüzdə iştirak edir və bizim “qaydalarımızı” qəbul edir. Biz sözün əsl mənasında girişdə onun yolunu kəsdik, maşından düşməsini istədik, bayram temalı kostyum geyindik və təbrik hissəsinə teatr tamaşası ilə başladıq”.
Tənqidlərə görə şirkətin saytında daha əvvəl qeyd olunan müəssisə günündən fotolar da yerləşdirilib.
Qeyd edək ki, "Yaroslavl Broyler" Yaroslavl vilayətinin ən böyük kənd təsərrüfatı müəssisəsidir və Rusiyanın ən böyük 20 quş əti istehsalçısı arasındadır. Şirkətin idarə heyətinin sədri E.Əzizovun əslən azərbaycanlı olduğu bildirilir.
