Qarabağ separatçılarının keçmiş “müdafiə naziri” Samvel Babayan yenidən aktivləşməyə başlayıb.

Axar.az xəbər verir ki, “Jamanak” qəzeti Babayanın bir müddət öncə partiya olduqlarını bəyan edən və de-fakto Nikol Paşinyanın himayəsində olan Sasna Çrerlə əməkdaşlıq edəcəyini yazıb. Bununla bərabər onun Robert Köçəryanla da gizli şəkildə əməkdaşlıq edəcəyi vurğulanıb.

Qeyd edək ki, Babayan keçən ilin noyabrında 6 il azadlıqdan məhrum edilmişdi. O, Ermənistanda dövlət çevrilişinə cəhd etməkdə şübhəli bilinərək, 22 martda tutulmuşdu. Erməni general “İqla” raketlərinin Ermənistana keçirilməsində və Serj Sərkisyana qarşı sui-qəsd təşkil etməkdə təqsirləndirilmişdi.

Babayan əslən Xankəndidəndir. Dağlıq Qarabağın Ermənistana birləşdirilməsini təbliğ edən “Miatsum” hərəkatının üzvlərindən olub. Qarabağda azərbaycanlılara qarşı xüsusi əməliyyatlarda iştirak edib. 1991-ci ilin iyununda həbs edildikdən sonra 6 ay müddətində Bakıda həbsdə saxlanılıb, sonradan azadlığa buraxılıb. Babayan Xocalı, Şuşa rayonlarının işğalında yaxından iştirak edib. O, həmçinin 1994-cü ildə atəşkəs müqaviləsinə imza atanlardan biridir.

Twitter