Türkiyə mallarına əlavə gömrük rüsumlarının tətbiqi əslində ABŞ administrasiyasının son dövrlər digər ölkələrə qarşı atdığı addımların tərkib hissəsidir.

Bu sözləri Axar.az-a ABŞ Prezidenti Donald Trampın türk mallarına əlavə rüsumların tətbiq edilməsi ilə bağlı qərarını şərh edən iqtisadçı ekspert Natiq Cəfərli deyib. O, Trampın sözügedən qərarının Türkiyə iqtisadiyyatına mənfi təsir edəcəyini deyib:

“Pompeo-Çavuşoğlu görüşündə bir çox problemlərin həlli ilə bağlı ilkin razılaşmaların əldə olunacağına dair gözləntilər var idi. Ancaq görüş çox pozitiv keçsə də, tərəflər arasında anlaşmalar əldə olunmadı. Çünki ABŞ tərəfindən Türkiyənin qarşısında çox sərt tələblər qoyulmuşdu. Bunlar həbsdə olan keşiş Bransonun azad olunması, noyabra qədər neft alışının dayandırılmasına dair İranla əlaqələrin kəsilməsi, S-400-lərin alışından imtinadır. Ankara isə bunun əvəzində ABŞ-ın FETÖ rəhbəri Fətullah Güləni təhvil verməsini və yeni növ silahların, təyyarələrin Türkiyəyə satışına icazə istəyir. Açığı, maraqlar üzərindən qarışıqlı alver gedir. Ancaq hələ ki, anlaşma yoxdur. Türkiyə mallarına əlavə gömrük rüsumlarının tətbiqi əslində ABŞ administrasiyasının son dövrlər digər ölkələrə qarşı atdığı addımların tərkib hissəsidir. Çünki ABŞ Çin, Avropa Birliyi, Hindistan, Latın Amerikasına, hətta ən yaxın qonşusu və ticarət tərəfdaşı Kanadaya qarşı da bu cür addımlar atıb. O üzdən Trampın qərarının sırf Türkiyəyə qarşı yönəldiyini düşünmürəm”.

İqtisadçı istənilən halda qərarın Türkiyə iqtisadiyyatına çox ciddi zərbə vuracağını bildirib:

“Türkiyə iqtisadiyyatında inflyasiyanın 12 faizdən yuxarı olması məhz bu gərginliyin nəticəsidir. Türkiyədən Şimali Amerikaya təxminən 16-18 milyard dollara yaxın ixracat var idi. İndi Trampın qərarından sonra Şimali Amerikaya ixrac olunan türk mallarının həcmində ciddi azalmalar müşahidə olunacaq”.

Qeyd edək ki, Tramp administrasiyası ABŞ-a gömrük vergisi vermədən daxil olan Türkiyə məhsullarına qarşı rüsumların tətbiqi məsələsini gündəmə gətirib.

Twitter