Uşaqlarımızın sağlam böyüməsi, öz uşaqlıq həyatını yaşaması onların erkən təhsilə cəlb olunmasından daha vacibdir.

Bu sözləri Axar.az-a 6 yaşı tamam olmayan uşaqların məktəbə qəbul edilməsinin mənfi nəticələri haqqında danışan təhsil eksperti Kamran Əsədov deyib. O bildirib ki, valdeyinlər uşaqların yaş xüsusiyyətlərini nəzərə almadan informasiya ilə çox yükləyirlər:

“Bu dəqiqə hansı uşağa baxırsan, eynəkdə, fiziki cəhətdən cılız görkəmdədir. Dünya təhsilinə meydan oxuyan Finlandiyada və digər ölkələrdə məktəbə ancaq 7 yaşı tamam olanları götürürlər. Təklif edirəm ki, 6 yaşı tamam olsa belə, uşaqları fiziki və zehni yoxladıqdan sonra birinci sinif qəbul edək. Say çoxalsın deyə, gələcəkdə daha ciddi fəsadların yaranmsına imkan vermək olmaz”.

Ekspert onu da qeyd edib ki, bu dəyişikliyin tətbiqi ərazilər üzrə ciddi şəkildə şagird sıxlığı yaradacaq və siniflərin, müəllimlərin çatışmazlığı ilə müşahidə olunacaq.

Psixoloqlar isə 6 yaşı tamam olmayan uşaqların məktəbə getməsinin diqqət dağınıqlığına səbəb olacağını bildirərək, bunun uşaqların aktivliyinə və qavrama qabiliyyətinə mənfi təsir edəcəyini söyləyirlər. Onların sözlərinə görə, 7 yaşlı uşaqlarla müqayisədə yaş fərqinə görə zehni bilgilərin az olması onlarda özünü ifadə edə bilməmək və özgüvənin sarsılması ilə nəticələnə bilər.

Qeyd edək ki, “Təhsil haqqında" qanuna edilən dəyişikliyə görə, təqvim ili ərzində 6 yaşı tamam olmuş uşaqların məktəbə qəbulu həyata keçiriləcək. Bakı Şəhəri üzrə Təhsil İdarəsinin müdiri vəzifəsini müvəqqəti icra edən Məhəbbət Vəliyeva isə bunun bəzi məktəblərdə cüzi sıxlıq yaradacağını bildirib.

Twitter