Ermənistanın Baş naziri Nikol Paşinyan növbəti hiyləgər gedişini etdi.

Axar.az xəbər verir ki, bu sözləri Ermənistanın KTMT-nin Baş katibi vəzifəsinə sabiq müdafiə naziri Vaqarşak Arutyunyanı təklif etməyə hazırlaşması ilə bağlı danışan politoloq Elxan Şahinoğlu deyib. Siyasi şərhçi bildirib ki, Paşinyanın KTMT-nin Baş katibi Yuri Xaçaturovu həbs etmək istəyi Kremlin xoşuna gəlməyib və Rusiya rəsmiləri İrəvanın bu qərarına açıq etirazlarını bildiriblər:

“Ancaq Paşinyan Moskvanın bu etirazı qarşılığında “səhv etdik, Yuri Xaçaturov fəaliyyətinə davam edə bilər” desəydi, tərəfdarlarının gözündə zəif görünəcəkdi, onun ünvanına “Kremlin xəbərdarlığından qorxdu” ifadəsini səsləndirəcəkdilər. Bəs, belə olan halda Paşinyan hansı addımı atdı? Ermənistanın baş naziri təşkilata Yuri Xaçaturovun əvəzinə baş katib kimi keçmiş müdafiə naziri Vaqarşak Arutyunyanın namizədliyini irəli sürdü. Kreml Xaçaturovun geri qaytarılmasına etiraz etsə də, Vaqarşak Arutyunyanın namizədliyinin əleyhinə də açıq mövqe bildirməkdə çətinlik çəkir. Çünki Vaqarşak Arutunyan tam ruspərəst biridir və məhz bu general Rusiyanın dəstəyi ilə Ermənistanda 1990-cı illərdə vacib hərbi postlarda çalışıb. Beləcə, Paşinyan Xaçaturovu geri çağırmaqla Moskvadan çəkinmədiyini, Vaqarşak Arutyunyanın namizədliyini irəli sürməklə isə Moskvanın maraqlarını nəzərə aldığını da büruzə verir. Tam erməni gedişidir”.

Qeyd edək ki, Ermənistan Kollektiv Təhlükəsizlik Müqaviləsi Təşkilatının Baş katibi vəzifəsinə sabiq müdafiə naziri Vaqarşak Arutyunyanı təklif etmək niyyətindədir.

Arutyunyan 1999-2000-ci illərdə müdafiə naziri vəzifəsini tutub.

Twitter